मुंबई : कोविड प्रतिबंधक लस (corona vaccination) घेतल्यानंतर घाटकोपर येथील १५ वर्षीय मुलीचा मृत्यू झाल्याची पोस्ट एका डॉक्टरने ट्विटरवर केली होती. महापालिकेने याप्रकरणी चौकशी केल्यांनतर या मुलीचा मृत्यू हृदयविकाराच्या झटक्याने (Heart attack) झाला असल्याचे आढळले आहे. तसे ट्विटही मुंबई महापालिकेने केले असून अफवा पसरवणाऱ्यांविरोधात कायदेशीर कारवाई करणार असल्याचे महापालिकेकडून सांगण्यात आले आहे. (Girl death is not due to corona vaccination)

घाटकोपरमधील डॉ. तरुण कोठारी यांनी या मुलीबाबत ट्विट केले होते. दरम्यान, या प्रकरणानंतर महापौर किशोरी पेडणेकर यांनी मुलीच्या कुटुंबीयांची भेट घेतली असून या प्रकरणात सविस्तर चौकशी करण्याचे निर्देश प्रशासनाला दिले आहेत. घाटकोपर येथील या मुलीने ८ जानेवारी रोजी राजावाडी रुग्णालयात लस घेतली होती.

त्यानंतर ११ जानेवारी रोजी या मुलीचा मृत्यू झाला होता. लसीकरणामुळे मुलीचा मृत्यू झाला नसल्याचे त्याच्या कुटुंबाचे म्हणणे आहे, असा दावा महापौरांनी केला आहे. दरम्यान, या प्रकरणात मृत्यू प्रमाणपत्र कोणी दिले, शवविच्छेदन का नाही झाले, असे प्रश्न महापौरांनी उपस्थित केले. तसेच या प्रकरणात चौकशीचे आदेशही महापौरांनी दिले आहेत.