नवी मुंबई : भारतीय क्रिकेट नियामक मंडळामध्ये (BCCI) नोकरीचे प्रलोभन दाखवून (Job decoy) अनेक बेरोजगारांची फसवणूक (job fraud) करण्यात आल्याचा प्रकार उघडकीस आला आहे. बीसीसीआयचे अध्यक्ष सौरभ गांगुली (Sourav ganguli), जय शहा (jay shah), सीईओ विनोद रॉय, डी. के. जैन यांच्या नावाने भामट्याला आलेले ई-मेल तरुणांना पाठवून साडेपाच लाख रुपयांचा अपहार केला. याप्रकरणी रबाळे पोलिस ठाण्यात (Rabale police station) फसवणुकीसह अपहाराचा गुन्हा दाखल (FIR) करण्यात आला. (Police complaint filed against culprit in bcci job decoy crime)

ऐरोली सेक्टर- २ मध्ये राहणाऱ्या मनीष पेंटर याने बीसीसीआयमध्ये आपली ओळख असल्याचे भासवले होते. याच ओळखीतून सुरक्षा रक्षक, मैदानातील कर्मचारी, देखभाल करणारे व इतर विविध पदांवर नोकरी मिळवून देत असल्याची माहिती त्याने ओळखीतील लोकांकडून पसरवली होती. या जाहिरातबाजीला भुलून अनेक बेरोजगार तरुण-तरुणींनी या भामट्याची भेट घेत नोकरीसाठी पैसे दिले होते. कळवा येथील राहणाऱ्या श्रीकृष्ण जावळे (वय २६) याने २०१७ मध्ये मनीष याची ऐरोलीतील घरी भेट घेतली होती. त्या वेळी मनीषने सांगितल्यानुसार सहायक मैदान कर्मचारी पदावर नोकरीसाठी श्रीकृष्णने ५० हजार रुपये दिले होते.

त्यानंतर श्रीकृष्ण याला बीसीसीआयच्या लेटरहेडवर सीईओ विनोद रॉय यांचे नाव व सही असलेले सुपरवायझर पदावर नेमणुकीचे पत्र दिले. ठरल्याप्रमाणे नोकरी न मिळाल्याने श्रीकृष्ण व अन्य तरुण-तरुणींनी विचारपूस केली असता मनीष याने विविध कारणे सांगून वेळ मारून नेली. तसेच पैसे परत देण्यात टाळाटाळ केली. अखेर आपली फसवणूक झाल्याचे समजताच त्यांनी रबाळे पोलिस ठाण्यात तक्रार दाखल केली.