मुंबई : केईएम रुग्णालयात दलित विद्यार्थ्याच्या रॅगिंगप्रकरणी एफआयआरमध्ये नाव असलेल्या एकाही आरोपीला अटक झालेली नाही किंवा त्यांना चौकशीलाही बोलावले गेलेले नाही. केईएम रुग्णालयातर्फे प्रसारमाध्यमांना चुकीची माहिती दिली जात आहे, असा आरोप करीत त्याचा निषेध करण्यासाठी जाती अंत संघर्ष समिती व दलित पँथर सुवर्ण महोत्सव समितीने मंगळवारी (ता. १८) मूक निदर्शने करण्याचा निर्णय घेतला आहे. (KEM Hospital Students Ragging)

रुग्णालयाबाहेर निषेध व्यक्त केला जाणार आहे. प्रकरण दाबण्याचा व आरोपींना वाचविण्याचा प्रयत्न कॉलेज अधिष्ठाता व पोलिसांकडून होत असल्याचा आरोप जाती अंत संघर्ष समितीने केला आहे. पीडित विद्यार्थ्याने भोईवाडा पोलिस ठाण्यात लेखी तक्रार केली आहे. एससी-एसटी आयोग (महाराष्ट्र) यांनीही त्यांच्या कार्यालयात घेतलेल्या सुनावणीत तत्कालीन महाविद्यालय अधिष्ठाता व पोलिसांना तात्काळ रॅगिंग व ॲट्रोसिटी ॲक्ट अन्वये गुन्हा नोंदविण्याचे आदेश दिले होते; परंतु तरीही पोलिस प्रशासनाने तात्काळ एफआयआर नोंदविला नाही, असे जाती अंत संघर्ष समितीचे प्रमुख कॉ. सुबोध मोरे यांनी सांगितले.