‘बुलीबाई’प्रकरणी न्यायालयाने गुरुवारपर्यंत निकाल राखून ठेवला मुंबई, ता. १८ : बुलीबाई ॲप प्रकरणातील तीन आरोपींनी केलेल्या जामीन अर्जावरील सुनावणी मंगळवारी पूर्ण झाली असून दंडाधिकारी न्यायालयाने गुरुवार (ता. २०) पर्यंत निकाल राखून ठेवला आहे. मुंबई पोलिसांनी आरोपी विशालकुमार झा, श्वेता सिंह आणि मयांक रावत यांच्या जामीन अर्जाला विरोध केला आहे. प्रकरणातील एक आरोपी नीरज बिश्नोईला अटक झाली आहे. त्याची आणि अन्य आरोपींची एकत्रित चौकशी करायची आहे, असा युक्तिवाद सरकारी वकिलांनी केला. आरोपींनी जाणीवपूर्वक ओळख लपवून शीख समुदायातील व्यक्तींची नावे वापरून ट्विटरवर पोस्ट केली आणि दोन समाजघटकांमध्ये तेढ निर्माण करण्याचा प्रयत्न केला, असा आरोप पोलिसांनी केला आहे. मुस्लिम समाजातील महिलांबाबत आक्षेपार्ह तपशील ॲपमध्ये आहे. ॲपची निर्मिती आपण केल्याची कबुली आरोपींनी दिली आहे, असा पोलिसांचा दावा आहे. आरोपींना नुकताच कोविडचा संसर्ग झाला होता. त्यामुळे त्यांना सरकारी रुग्णालयात क्वारंटाईन करण्यात आले होते.