पालघर : एडवणजवळील भादवे येथे रस्त्यावर उभ्या असलेल्या ट्रकचा अंदाज न आल्याने त्या ट्रकला पाठीमागून मोटरसायकल आदळून झालेल्या अपघातात (Truck-bike accident) एडवण येथील दोन तरुणांचा जागीच मृत्यू (Two people died) झाल्याची दुर्दैवी घटना शुक्रवारी रात्री घडली. गणेश वामन वैती (४५) आणि दिपेश जयवंत तरे (३५) असे मृत्यू झालेल्या तरुणांची नावे आहेत. गणेश आणि दिपेश हे दोघे सफाळेजवळील रामबाग येथील अमेटी लेदर इंटरनॅशनल कंपनीत काम करीत होते.

शुक्रवारी रात्री ८ वाजण्याच्या सुमारास कंपनीतून काम आटोपून दोघेही नेहमीप्रमाणे आपल्या मोटरसायकलीवरून आपल्या घराकडे निघाले होते. हे दोघेही भादवेजवळ आले असताना संतोष पाटील यांच्या मालकीचा एक ट्रक बंद अवस्थेत रस्त्यावर उभा होता. यावेळी या ट्रकला साईड सिग्नल अथवा कुठलेही मार्गदर्शक चिन्ह न लावता चालक जावेद मोहमद शेख यांनी आपला ट्रक उभा केल्याने अंधारात उभ्या ट्रकचा अंदाज न आल्याने मोटरसायकलने ट्रकला मागून जोरदार धडक दिली. ही धडक इतकी जोरदार होती की, या अपघातात दोन्ही तरुणांचा जागीच मृत्यू झाला. या अपघाताची नोंद केळवे सागरी पोलिस ठाण्यात करण्यात आली असून पोलिस अधिक तपास करीत आहेत.