कोल्ही शाळेस जिल्हा परिषद अध्यक्षांची भेट विरार, ता. २४ (बातमीदार) ः पालघर जिल्हा परिषदेच्या अध्यक्षा वैदेही वाढाण यांनी वसई येथील जिल्हा परिषद शाळा कोल्ही येथे भेट देऊन शाळेच्या समस्या जाणून घेतल्या. शाळेत २८६ पटसंख्या व ६ शिक्षक कार्यरत असून फक्त तीनच वर्गखोल्या उपलब्ध आहेत. त्यामुळे विद्यार्थ्यांना अडचण निर्माण होत आहे; परंतु नवीन इमारतीसाठी जागा उपलब्ध नसल्याने जुन्या शाळा इमारतीच्या जागीच नवीन इमारत बांधण्याबाबत कार्यकारी अभियंता यांना इमारतीचे स्ट्रक्चरल ऑडिट करण्याच्या सूचना दिल्या. या वेळी वैदेही वाढाण यांनी शाळेतील पोषण आहाराची पाहणी केली. तसेच कोरोना प्रतिबंध पाळून आहारवाटपाच्या सूचना दिल्या. त्यानंतर जिल्हा परिषद शाळा चिंचोटी येथे भेट देऊन सदर शाळेबाबत समस्या जाणून घेतल्या. या वेळी जिल्हा परिषद सदस्य कृष्णा माळी, माजी सभापती महिला व बालकल्याण नमिता राऊत, उपशिक्षणाधिकारी जनाथे, कार्यकारी अभियंता शिंदे, गटशिक्षणाधिकारी उपस्थित होते.