नारायण मेघाजी लोखंडेंचा पुतळा बसवा! वडाळा, ता. ३१ (बातमीदार) ः मुंबई कामगार चळवळीचे जनक रावबहादूर नारायण मेघाजी लोखंडे यांच्या कार्यकर्तव्याची आजपर्यंत स्मारकरूपाने मुंबई शहरांमध्ये दखल घेण्यात आली नाही, ही खेदजनक बाब असल्याचे सांगून पुतळा बसवण्याची मागणी करण्यात आली आहे. नारायण मेघाजी लोखंडे यांच्या कार्याचा आदर्श घेऊन कामगार व कामगार चळवळीचे नेते भावी पिढीला दिशा देतील. त्यासाठी हुतात्मा बाबू गेनू मुंबई गिरणी कामगार क्रीडा भवन येथील आवारात नारायण मेघाजी लोखंडे यांचा पुतळा बसविण्यात यावा, यासाठी नारायण मेघाजी लोखंडे स्मृती विचार मंच या संस्थेचे अध्यक्ष सुदाम गाडेकर यांनी महाराष्ट्र कामगार कल्याण मंडळाचे आयुक्त रविराज इळवे यांची सोमवारी (ता. ३१) त्याच्या कार्यालयात भेट घेऊन त्यांना निवेदन दिले. तसेच नारायण मेघाजी लोखंडे यांचे पणतू गोपीनाथ लोखंडे यांनी राजाराम सूर्यवंशी लिखित लोखंडे यांचे चरित्र दिले. यावेळी संस्थेचे सेक्रेटरी जगन्नाथ कुदळे, प्रमुख सल्लागार नवनीत सिनलकर, दत्तात्रय माळी, सचिन नागवेकर आदी उपस्थित होते. ...