मुंबई मध्य आरटीओच्या कॅम्पला उत्स्फूर्त प्रतिसाद सकाळ वृत्तसेवा मुंबई, ता. ३१ : मुंबई मध्य आरटीओ कार्यालयांतर्गत २९ आणि ३० जानेवारीला पक्क्या लायसन्ससाठी कॅम्प घेण्यात आला. दोन दिवसांत या कॅम्पसाठी १८०० नागरिकांनी नोंदणी केली होती. त्यापैकी सुमारे १४०० नागरिकांची चाचणी घेण्यात आली आहे. कोरोनाच्या पार्श्वभूमीवर पक्क्या लायसन्सची अनेक प्रकरणे प्रलंबित होती. त्याचा निपटारा करण्यासाठी आरटीओ भारत कळसकर यांनी पुढाकार घेतला. परिवहन विभागाने लर्निंग लायसन्ससाठी फेसलेस सुविधा उपलब्ध केल्यानंतर मुंबईतील प्रादेशिक परिवहन कार्यालयांमध्ये पक्क्या लायसन्ससाठी स्लॉट बुक होत नसल्याची अडचण निर्माण झाली होती. तसेच कोरोनामुळे अनेकांना आरटीओ कार्यालयात येणे अशक्य होते. त्यावर तोडगा म्हणून मुंबई मध्य आरटीओने कार्यालयीन दिवसांव्यतिरिक्त सुटीच्या दिवशीही पक्‍क्या लायसन्ससाठी चाचण्या घेण्याचा निर्णय घेतला होता.