तुर्भे : माघ महिना सुरू होताच लग्नाचा धूमधडाका (Marriage ceremony) सुरू होतो. मध्यंतरी शहरातील कोरोना रुग्णांची संख्या (corona new patients) झपाट्याने वाढल्‍याने लग्‍न समारंभ, सार्वजनिक कार्यक्रमांवर (public events) प्रशासनाने कठोर निर्बंध लागू केले. त्यात लग्न सोहळ्यासाठी ५० जणांचीच परवानगी देण्यात आली आहे. जास्त वऱ्हाडी आढळल्‍यास दंडात्मक कारवाई करण्याचा इशारा देण्यात आला आहे. सध्या कोरोना रुग्णांची संख्या आटोक्यात आली असली तरी लग्न सोहळ्यासाठी प्रशासनाकडून (Government restrictions) लावलेले निर्बंध ‘जैसे थे’ असल्याने वर-वधूकडील मंडळींना लग्‍न समारंभासाठी कुणाला बोलवावे, कुणाला टाळावे, असा प्रश्‍न पडला आहे.

सध्या तरी नवी मुंबई महापालिका क्षेत्रात कोरोनाबाधितांच्या संख्येत घट झाली असली तरी निर्बंध शिथिल करण्यात आलेले नाहीत. दीड-दोन वर्षांपासून लग्‍नासाठी इच्छुकांनाही यंदाही मोजक्याच वऱ्हाडी मंडळींच्या उपस्थितीत साजरे करावे लागणार असल्याने उपवर-उपवधू मंडळींचा हिरमोड झाला आहे. अनेकांना आपला लग्न सोहळा मोठ्या थाटात करावयाचा आहे; परंतु निर्बंधामुळे केवळ ५० जणांनाच परवानगी आहे. त्यामुळे कधी एकदाचे निर्बंध हटविले जातील आणि लग्नाचे बार धूमधडाक्यात उडविले जातील, याकडे अनेकांचे लक्ष लागले आहे.

दोन वर्षांपासून लग्न सोहळ्यावर अवलंबून असणाऱ्या व्यावसायिकांवर आर्थिक संकट ओढावले आहे. नातेवाईकांचे नाराजी नाट्य घरातील पहिले लग्न असल्याने धूमधडाक्यात वऱ्हाडी मंडळींच्या उपस्थितीत साजरे व्हावे, अशी काहींची इच्छा आहे. त्‍यामुळे दोन वर्षांपासून लग्नाच्या तारखा पुढे ढकलल्या असून आता निर्बंध शिथिल होण्याची वाट पाहत आहेत. अनेक वधू-वराच्या नातवाईकांची संख्याच शंभरच्या वर जात असल्‍याने कुणाला बोलवावे, कुणाला टाळावे, असा प्रश्‍न कुटुंबीयांना पडला आहे. नातेवाईकांचे नाराजी नाट्य टाळण्यासाठी विवाहेच्छुक अनेकांनी लग्‍नाच्या तारखाच काढलेल्‍या नाहीत.