मुंबई, ता. १३ : इंडियन रेल्वे कॅटरिंग अँड टुरिझम कॉर्पोरेशन लिमिटेडने (आयआरसीटीसी) कोविडच्या पार्श्वभूमीवर लांब पल्ल्यांच्या एक्स्प्रेस गाड्यांमध्ये खानपान (कॅटरिंग) सेवा बंद केली होती; मात्र आता कोविडचे सावट कमी झाल्याने प्रवाशांच्या सोयीसाठी सोमवारपासून (ता. १४) आयआरसीटीसीकडून सर्व एक्स्प्रेस गाड्यांमध्ये शिजलेले अन्न पुरवणार आहे. देशभरातील जवळपास ५०० हून अधिक गाड्यांमध्ये ही सुविधा सुरू होणार आहे.

कोविडच्या पार्श्वभूमीवर २३ मार्च २०२० पासून रेल्वेतील खानपान सेवा बंद केली होती. त्यानंतर डिसेंबर २०२१ पासून सुमारे ३० टक्के, तर २२ जानेवारीपासून ८० टक्के शिजवलेले अन्न पुरवले जात होते. त्यानंतर आता १४ फेब्रुवारीपासून सर्व गाड्यांमध्ये १०० टक्के शिजवलेले अन्न पुरवले जाणार आहे. गेल्या डिसेंबर महिन्यापासून पश्चिम रेल्वेच्या मुंबई सेंट्रल-नवी दिल्ली-मुंबई सेंट्रल राजधानी एक्सप्रेस आणि मुंबई सेंट्रल-हजरत निजामुद्दीन-मुंबई सेंट्रल ऑगस्ट क्रांती एक्स्प्रेसमध्ये ‘रेडी-टू-इट’सह शिजवलेले खाद्यपदार्थ देण्याची सुविधा सुरू केली आहे. त्यापाठोपाठ जानेवारीच्या दुसऱ्या आठवड्यापासून या दोन्ही गाड्यांमध्ये ऑनबोर्ड कॅटरिंग सुविधा सुरू झाली आहे. त्यामध्ये जेवणातील पदार्थ निवडण्याचा पर्याय प्रवाशांसाठी उपलब्ध असेल, अशी माहिती पश्चिम रेल्वे प्रशासनाकडून देण्यात आली.