भांडुप, ता. २४ (बातमीदार) ः भांडुप पोलिस ठाण्याचे वरिष्ठ निरीक्षक नितीन उन्हवणे यांनी परिसराची पाहणी करत कायदेविषयक जनजागृती केली. तसेच भट्टीपाडा व्यापारी मंडळाला भेट दिली. मंडळातर्फे पुष्पगुछ देऊन त्यांचे स्वागत करण्यात आले.
व्यापाऱ्यांना मार्गदर्शन करताना ते म्हणाले की, कायदा-सुव्यवस्था राखणे ही जरी पोलिसांची जबाबदारी असली तरी नागरिकांच्या सहभागाशिवाय पोलिसांना उद्दिष्टपूर्ती करता येणे शक्य नाही. त्यामुळे कायदा-सुव्यवस्था राखण्याच्या कामात नागरिकांनी सहकार्य करणे गरजेचे आहे. तसेच भांडुप परिसरात अमली पदार्थांविरोधात नागरिकांनी सतर्क राहून न घाबरता तक्रार करायला पुढे यावे, असे आवाहनही केले. याप्रसंगी व्यापारी मंडळाचे अध्यक्ष चंद्रकांत मेहता, खजिनदार पंकेश जैन, विष्णू कोकण, धीरज जैन, सुभाष कोठारी, चिराग छेडा आणि अन्य व्यापारी उपस्थित होते.