चेंबूर ता. २६ (बातमीदार) ः राष्ट्रवादी काँग्रेसचे अल्पसंख्याक मंत्री नवाब मलिक यांच्यावर ईडीने कारवाई केल्याने त्यांनी मंत्रिपदाचा राजीनामा द्यावा, या मागणीकरिता एकीकडे भाजप रस्त्यावर उतरून आंदोलन करीत आहे; तर दुसरीकडे राष्ट्रवादीने भाजपविरोधात निदर्शने केली.
तपास यंत्रणांचा गैरवापर करून महाविकास आघाडी सरकार अस्थिर करण्यासाठी नवाब मलिक यांना अटक केल्याच्या आरोप करीत केंद्र सरकारच्या दडपशाहीचा निषेध करण्यासाठी आज कुर्ला पश्चिम रेल्वे स्टेशनसमोर व पांजरापोळ या ठिकाणी प्रदेश अध्यक्ष व जलसंपदा मंत्री जयंत पाटील व मुंबई प्रदेश राष्ट्रवादी युवक काँग्रेस अध्यक्ष नीलेश भोसले, अणुशक्तीनगर तालुका अध्यक्ष संजय कांबळे, नगरसेविका डॉ. सईदा खान, सना मलिक, कुमुद जयकर यांच्या नेतृत्वाखाली निदर्शने करण्यात आली. या वेळी कुर्ला विधानसभा क्षेत्राचे शिवसेनेचे आमदार मंगेश कुडाळकर, शिवसेना नगरसेविका सान्वी तांडेल, राष्ट्रवादी काँग्रेसचे नगरसेवक कप्तान मलिक, जितेंद्र जाधव तसेच महाविकास आघाडी पक्षांचे शाखाप्रमुख, उपशाखाप्रमुख, तालुका अध्यक्ष, वॉर्ड अध्यक्ष, पदाधिकारी आणि कार्यकर्ते मोठ्या संख्येने सहभागी झाले होते.