मुंबई, ता. २६ : पालिकेच्या गटनेत्यांनी मुंबई पालिकेत मराठी भाषा विभाग सुरू करण्याचा ठराव करूनही काही वर्षे होत आली आहेत, परंतु अद्याप हा विभाग सुरू झालेला नाही. हा विभाग सुरू करण्याबाबत कोणतेही प्रयत्न पालिकेने सुरू केलेले नाहीत.
पालिकेचा कारभार १०० टक्के मराठीत करण्याचा कायदा आहे; मात्र आजही अनेक प्रशासकीय परिपत्रके इंग्रजीत प्रसिद्ध केली जातात. गेल्या वर्षी मराठी भाषा दिनाच्या निमित्त वृत्तपत्र लेखक भाऊ सावंत यांनी पालिकेकडे मराठी भाषा विभाग सुरू होण्यासाठी पत्रव्यवहार केला होता. महापौर किशोरी पेडणेकर, पालिका आयुक्त इक्बालसिंह चहल, सभागृह नेत्या विशाखा राऊत, पालिकेतील विरोधी पक्षनेते रवी राजा, भाजपचे गटनेते प्रभाकर शिंदे आदींना पत्र पाठवले होते. त्यात मराठी भाषा संवर्धनासाठी मराठी भाषा विभाग सुरू करण्याची मागणी केली होती. यानंतर गटनेत्यांमध्ये चर्चा होऊन असा विभाग सुरू करण्याबाबत प्रशासनाने कार्यवाही करण्याचे निर्देश दिले होते; मात्र अद्याप हा विभाग सुरू झालेला नाही.