भाईंदर, ता. २७ (बातमीदार) ः मिरा-भाईंदर महापालिकेचा आगामी आर्थिक वर्षांचा अर्थसंकल्प उद्या (ता. २८) सादर होणार आहे. पालिका आयुक्त हा अर्थसंकल्प स्थायी समितीचे सभापती राकेश शहा यांच्याकडे सुपूर्द करतील. त्यानंतर स्थायी समितीमध्ये अर्थसंकल्पावर सविस्तर चर्चा होऊन तो अंतिम मान्यतेसाठी महासभेपुढे सादर केला जाईल. गेल्या संपूर्ण वर्षात कोरोनामुळे महापालिकेच्या आर्थिक स्थितीवर मोठा परिणाम झाला आहे. त्याचा परिणाम विकासकामांवरही झाला आहे. त्यामुळे या परिस्थितीवर मात करण्यासाठी यावेळेच्या अर्थसंकल्पात प्रशासनाकडून काय उपाययोजना केल्या जातात, याकडे सर्वांचे लक्ष लागले आहे. गेल्या वर्षी प्रशासनाने सुमारे १५०० कोटी रुपयांचा अर्थसंकल्प तयार केला होता. त्यात सत्ताधाऱ्यांनी वाढ करून तो तब्बल २००० कोटी रुपयांपर्यंत फुगवला होता. या पार्श्वभूमीवर प्रशासनाच्या आगामी अर्थसंकल्पात काय दडले आहे, याबाबत उत्सुकता लागली आहे.