वाशी, ता. ३० (बातमीदार) ः घाऊक कांदा-बटाटा बाजारात सध्या खरेदीदारांची संख्या रोडावली आहे. त्यामुळे कांदा-बटाट्याच्‍या दरात मोठी घसरण पाहायला मिळत आहे. सध्या बाजारात दररोज १०० ते १५० गाड्यांची आवक होत आहे. मात्र त्या मानाने कांद्याला उठाव नसल्याने दर घसरले आहेत. कांद्याचे दर २० ते २२ रुपयांवरून १० ते १३ रुपये किलोपर्यंत आले आहेत.
राज्यात सर्वत्र उन्हाचा तडाखा वाढला आहे. पुढील तीन-चार दिवस उन्हाच्या झळा बसणार असल्‍याचा इशारा हवामान खात्‍याने दिला आहे. पारा वाढल्‍याने भाज्‍यांची आवक कमी झाल्‍याने दर वाढले आहेत; तर कांदा-बटाटा मार्केटमध्ये आवक वाढल्‍याने दर कमी झाले आहेत.
बाजारात ग्राहक नसल्याने बराच माल पडून आहे. त्यामुळे कांदा-बटाट्याचे दर घसरले आहेत. मार्च महिन्याच्या सुरुवातीला घाऊक बाजारात कांद्याचे दर २० त २२ रुपये किलोपर्यंत होते; तर किरकोळमध्ये ३० रुपयांपर्यंत दर पोचले होते. आता घाऊक बाजारात कांदा १० ते १३ रुपये किलो झाला आहे. त्यामुळे किरकोळ बाजारात कांदा २० रुपये किलोच्या घरात असल्‍याची माहिती घाऊक व्यापारी मनोहर तोतलानी यांनी दिली आहे.
बटाट्याचे दरही १२ ते १४ रुपये किलो झाले आहेत. आतापर्यंत बाजारात नवीन बटाटा येत होता. मात्र वाढत्या उष्णतेमुळे बटाट्याचे मोठे नुकसान होत होते. गाडीतच बटाटा खराब होत आहे. त्यामुळे बटाट्याच्या दरात घसरण झाल्‍याचे पाहायला मिळते. गेल्‍या दोन-चार दिवसांपासून शीतगृहातील बटाटा बाजारात येऊ लागला आहे. त्यामुळे चांगला माल बाजारात येत आहे. मात्र असे असले तरी बाजारात खरेदीदार नसल्याने मालाला उठाव मिळत नसल्याने दरात घसरण सुरूच आहे.

कांद्याचे घाऊक दर
महिन्याभरापूर्वी २० ते २२
आता १० ते १३

किरकोळ दर
कांदा २० ते २२
बटाटा २२ ते २५