तरण तलावात मुलीचा बुडून मृत्यू

भाईंदर, ता. १ (बातमीदार) : उत्तन येथे तरण तलावात बुडून एका सहावर्षीय मुलीचा मृत्यू झाल्याची घटना घडली आहे. उत्तन येथील चौक भागातील एका बंगल्यात दाम्पत्य आपल्या सहावर्षीय जुळ्या मुलांसह सहलीसाठी आले होते. दाम्पत्य बंगल्याच्या पहिल्या मजल्यावर न्याहारी घेत असताना त्यांची दोन्ही मुले तळमजल्यावर खेळण्यासाठी गेली होती. दीपिकाचा खेळताना पाय घसरून ती लगतच्या तरण तलावात पडली. तिला पाण्यात पडल्याचे पाहून तिचा भाऊ रडू लागला. त्याच वेळी पहिल्या मजल्यावर असलेल्या त्यांच्या पालकांनाही ती पाण्यात पडलेली दिसली. त्यांनी तातडीने धाव घेऊन दीपिकाला पाण्याबाहेर काढले; मात्र तोपर्यंत तिचा मृत्यू झाला होता, अशी माहिती उत्तन सागरी पोलिस ठाण्याचे वरिष्ठ निरीक्षक प्रशांत लांगी यांनी दिली.