नवी मुंबई : नवी मुंबई शहरात (Navi Mumbai City) पहिल्यांदाच साकारण्यात येणाऱ्या ‘दिवाळे स्मार्ट व्हिलेज’ला (Diwale smart village) देशाचे पंतप्रधान नरेंद्र मोदी (Narendra Modi) यांनी शुभेच्छा दिल्या आहेत. बेलापूरच्या भाजप आमदार मंदा म्हात्रे (Manda Mhatre) यांनी सोमवारी मोदींची दिल्ली येथे भेट घेतली. या प्रसंगी प्रकल्पात उभारण्यात येणाऱ्या पायाभूत सुविधांच्या (Basic facilities) विविध वास्तू, सुटसुटीत रस्ते, सुनियोजित पदपथ, मार्केट, बहुउद्देशीय इमारती आदींबाबत म्‍हात्रे यांनी माहिती दिली.

राज्याचे विरोधी पक्षनेते देवेंद्र फडणवीस यांच्या हस्ते मंगळवारी, २९ मार्चला दिवाळे गाव स्मार्ट व्हिलेजचे भूमिपूजन झाले. नवी मुंबईतील हा पहिलाच प्रकल्प असल्याने या प्रकल्पाची सर्वांनाच उत्सुकता लागली आहे. सिडकोच्या माध्यमातून नवी मुंबई शहरासारखी जागतिक कीर्तीचे नियोजित शहर उभे राहीले. परंतु या शहरातील गावाची नियोजनाअभावी दुर्दशाच झाली. दाटीवाटीने बांधकाम आणि अनधिकृत बांधकामांमुळे आलेली अवकळा आता स्मार्ट व्हिलेजमुळे दूर होणार आहे. या प्रकल्पामुळे दिवाळे गावाचा कायापालट होणार आहे.

मंदा म्हात्रे यांच्या अविरत पाठपुराव्यामुळे याआधीच गावातील मच्छीमार बांधवांना मासळी सुकविण्यासाठी व होड्यांसाठी अद्ययावत जेटी उभारण्यात आली आहे. त्यानंतर मोकळे रस्ते उभारण्याचे काम सुरू आहे. आता त्यापाठोपाठ गावाला लागणाऱ्या सर्व पायाभूत सुविधांचा नियोजित विकास केला जाणार आहे. मासळी मार्केटपासून ते बहुउद्देशीय इमारत उभारण्यात येणार आहे. या प्रकल्पाला मंदा म्हात्रे यांच्या आमदार निधीतून अर्थसाहाय्य उभे केले जाणार आहे.

प्रकल्‍पाच्या दर्जेदार कामावर लक्ष

पंतप्रधान नरेंद्र मोदी यांच्या संकल्पनेतून साकारणारे दत्तक गाव योजनेतून मंदा म्हात्रे यांनी दिवाळे गाव दत्तक घेत पहिले स्मार्ट व्हिलेज साकारणार आहे. तत्पूर्वी या प्रकल्पाची मंदा म्हात्रे यांनी दिल्ली येथे पंतप्रधानांची भेट घेऊन सर्व माहिती सादर केली. हा प्रकल्प कसा आणि कधीपर्यंत पूर्ण होणार याची चौकशी मोदी यांनी म्हात्रेंकडे केली. तसेच या प्रकल्पाच्या दर्जेदार कामासोबतच पूर्णत्वाला येणाऱ्या कामांवर विशेष लक्ष ठेवणार असल्याची ग्वाही म्हात्रेंकडे दिली. त्यामुळे दिवाळे गावाचे नाव स्मार्ट व्हिलेज होण्याआधीच दिल्लीपर्यंत पोहोचले असल्याने मंदा म्हात्रे यांनी आनंद व्यक्त केला.