ठाणे : राष्ट्रवादी काँग्रेसचे (NCP) अध्यक्ष शरद पवार (Sharad Pawar) यांच्या मुंबईतील घरावर हल्ला करणाऱ्या अनेकांच्या रक्तामध्ये मद्याचे अंश (Alcohol in blood) सापडले असल्याची खळबळजनक माहिती गृहनिर्माण मंत्री जितेंद्र आव्हाड (Jitendra Awhad) यांनी दिली. महात्मा गांधींच्या हत्येच्या (Mahatma Gandhi death) वेळी समाजामध्ये जे विष पेरण्यात आले होते, आताही असेच विष शरद पवार यांच्याविरोधात पेरण्याचे काम सुरू असल्याचा दावाही ठाण्यात आयोजित मूक मोर्चात केला.

राष्ट्रवादी काँग्रेसचे राष्ट्रीय अध्यक्ष खासदार शरद पवार यांच्या घरावर शुक्रवारी एसटी कर्मचाऱ्यांनी हल्ला केला होता. या हल्ल्यानंतर राष्ट्रवादी काँग्रेसच्या कार्यकर्त्यांमध्ये प्रचंड संतापाचे वातावरण निर्माण झाले आहे. त्यानुसार शनिवारी राष्ट्रवादी काँग्रेसच्या कार्यकत्र्यांनी ठाणे जिल्ह्यात ठिकठिकाणी आंदोलने केली. ठाण्यात महात्मा गांधी यांच्या पुतळ्यासमोर राष्ट्रवादीच्या कार्यकर्त्यांनी तोंडाला काळ्या फिती बांधून मूक आंदोलन केले.

या आंदोलनात गृहनिर्माण मंत्री जितेंद्र आव्हाड, शहराध्यक्ष आनंद परांजपे उपस्थित होते. आम्ही एसटी कर्मचऱ्यांच्या विरोधात नाही. हल्ल्याचा तीन एसटी कर्मचारी संघटनांनी निषेध केल्याच्या बातम्या वाचायला मिळाल्या; पण शुक्रवारी ज्यांनी हल्ला केला. त्यापैकी अनेकांच्या रक्तामध्ये मद्याचे अंश सापडले असून कालची घटना ही महाराष्ट्राला मान खाली घालायला लावणारी होती, अशी प्रतिक्रिया यावेळी जितेंद्र आव्हाड यांनी दिली.