कल्याण : कल्याण रेल्वे स्थानकात (Kalyan Railway station) रेल्वे प्रशासनाने मूलभूत सुविधा (Basic facility) दिल्या असताना या स्थानकात वाढते अपघात पाहता रेल्वे स्थानक मृत्यूचा सापळा (Death Location) बनत आहे. लोकल, मेलमधून पडून तसेच रूळ ओलांडताना होणारे अपघात (Railway Accidents) वाढले आहेत. मागील तीन महिन्यात रेल्वे स्थानकात झालेल्या अपघातामध्ये ७८ जणांचा मृत्यू झाला असून ६५ जण जखमी झाले आहेत.

कल्याण रेल्वे स्थानक हे देशातील गर्दीचे तिसरे रेल्वे स्थानक असून सात फलाट आहेत. येथून लोकल आणि मेल गाडीने जाणाऱ्या प्रवाशांची संख्या लाखोंच्या घरात आहे. रेल्वे स्थानकात रेल्वे प्रशासनाने सरकते जिने, पादचारी पूल बसवले आहेत; मात्र तरीसुद्धा बेशिस्त प्रवाशांमुळे अपघात होत आहेत. रेल्वे क्रॉसिंग करताना होणाऱ्या अपघातामध्ये वाढ झाली आहे.

जानेवारी ते मार्च कालावधीत झालेले अपघात मृत्यू
रेल्वेरूळ ओलांडताना अपघात - ४०
लोकल, मेलमधून पडून अपघात - १६
खांबाला धडकून अपघात - २
नैसर्गिक मृत्यू - १८
इतर कारणाने मृत्यू - २

१७ मृतदेहांची ओळख पटवण्याचे आवाहन

रेल्वे स्थानकात झालेल्या एकूण मृत्यूची संख्या ७८ असून यात पुरुष ७५ असून तीन महिलांचा समावेश आहे. ६१ मृतांचे वारस सापडले असून १७ मृतांचे वारस शोधण्याचे आव्हान रेल्वे पोलिसांना समोर आहे.

प्रवाशांनी चालत्या गाडीतून उतरू अथवा चढू नये. रेल्वे प्रवास करताना रेल्वे स्थानकात पादचारी पूल आणि सरकत्या जिन्याचा वापर करावा.
- वाल्मिक शार्दूल, वरिष्ठ पोलिस निरीक्षक, कल्याण रेल्वे पोलिस ठाणे