उल्हासनगर, ता. १२ (वार्ताहर) ः शौचालयाला जाताना मोबाईल चोरांनी वार केल्याने गंभीर जखमी झालेल्या बिगारी कामगाराचा तिसऱ्या दिवशी उपचारादरम्यान मृत्यू झाला. मुन्नीलाल जसवार हे उल्हासनगरातील कॅम्प ३ मधील जिरा चौकात राहत होते. तीन दिवसांपूर्वी पहाटे पाचच्या सुमारास सार्वजनिक शौचालयात जात असताना दुचाकीवर आलेल्या दोघांनी त्यांच्यावर वार केले आणि जखमी अवस्थेत खाली पडलेल्या मुन्नीलालच्या हातातून मोबाईल हिसकावून पळ काढला. ही घटना सीसीटीव्हीमध्ये कैद झाली आहे. या हल्ल्यात मुन्नीलालच्या डोक्यावर, पाठीवर, बरगड्यांवर वार झाल्याने त्यांना प्रथम शासकीय रुग्णालयात दाखल करण्यात आले. मात्र प्रकृती चिंताजनक असल्याने त्यांना क्रिटिकेअर आणि त्यानंतर जे.जे. रुग्णालयात हलवण्यात आले होते. तिथे अखेर मुन्नीलाल यांचा मृत्यू झाला. प्रकरणी मध्यवर्ती पोलिस ठाण्यात गुन्हा दाखल झाला आहे.