डोंबिवली - आधारवाडी कारागृहात कैद्यांनी (Prisoners) तुरुंग अधिकाऱ्याच्या (Jail Officer) अंगावर मानवी विष्टा फेकून त्यांना मारहाण (Beating) केली. त्यानंतर स्वतःवरही पत्र्याने वार करीत जखमी करून घेतल्याची घटना घडली आहे. याप्रकरणी तुरुंग अधिकारी रोहित बाविस्कर यांनी दिलेल्या फिर्यादीवरून खडकपाडा पोलिस ठाण्यात कैदी लखन जाधव व रवींद्र भोसले यांच्याविरोधात गुन्हा दाखल करण्यात आला आहे.

कल्याण आधारवाडी कारागृहात बुधवारी सकाळी ११.१५ वाजण्‍याच्या सुमारास ही घटना घडली. तुरुंग अधिकारी बाविस्कर हे सर्कल नं. ७ मंडल कार्यालयाजवळ आले असता लखन व रवींद्र यांनी पूर्व नियोजित कट करून मानवी विष्टा त्यांच्या अंगावर फेकली व हल्ला केला. कैद्यांनी हल्ला केल्याचे पाहून इतर अधिकारी तेथे येताच या दोन कैद्यांनी जुन्या लोखंडी धारदार पत्र्याच्या तुकड्याच्या साह्याने स्वतःच्या मानेवर, गळ्यावर जखमा करून घेतल्या. याप्रकरणी दोन्ही कैद्यांविरोधात खडकपाडा पोलिस ठाण्यात गुन्हा दाखल करण्यात आला असून सहाय्यक पोलिस निरीक्षक अमोल खोंडे हे अधिक तपास करीत आहेत.