मुंबई, ता. १८ ः महापालिकेतील सत्ताधारी शिवसेनेचा भ्रष्टाचारी कारभार उघड करण्यासाठी मुंबई भाजपने मोहीम सुरू केली असून या पोलखोल मोहिमेची सुरुवात रविवारी गोरेगावच्या पत्राचाळीपासून करण्यात आली.
या वेळी मुंबई भाजप अध्यक्ष आमदार मंगलप्रभात लोढा, आमदार अतुल भातखळकर, अमित साटम, योगेश सागर आदी उपस्थित होते. पत्राचाळ पुनर्विकास प्रकल्पातही शिवसेनेने भ्रष्टाचार केल्यामुळे तेथील रहिवासी रस्त्यावर आल्याचा भाजपचा आरोप आहे. याच प्रकरणात नुकतीच ईडीने शिवसेना नेते संजय राऊत यांच्या नातलगांच्या ११ मालमत्तांवर टाच आणली आहे. त्यामुळे भाजपने ही मोहीम पत्राचाळीपासूनच सुरू केली. या वेळी पोलखोल मोहिमेच्या रथाचेदेखील उद्‍घाटन करण्यात आले. या वेळी आयोजित सभेत भाजप नेत्यांनी शिवसेनेच्या भ्रष्टाचारी कारभारावर टीका केली. यापुढे शिवसेनेचे इतर भ्रष्टाचारही या मोहिमेतून उघड केले जातील, असेही सांगण्यात आले.