बोर्डी, ता. २४ (बातमीदार) ः सेवानिवृत्त कर्मचारी संघटना बोर्डी शाखेची वार्षिक सर्वसाधारण सभा शनिवारी (ता. २३) बोर्डी येथील आत्माराम पंत सावे सभागृहात झाली. कार्यक्रमाच्या अध्यक्षस्थानी कर्मचारी संघटनेचे जिल्हाध्यक्ष हरिश्चंद्र वझे, राज्याचे सल्लागार समिती सदस्य मारुती वाघमारे, उमा राऊत, प्रमुख अतिथी कोषाध्यक्ष किरीट पटेल उपस्थित होते.

कोरोनाच्या पार्श्वभूमीवर मागच्या दोन वर्षांत निवृत्त कर्मचारी संघटनेच्या सदस्यांना एकत्र येण्याची संधी मिळाली नव्हती. त्यामुळे या सभेस सदस्यांची शंभर टक्के उपस्थिती होती. याप्रसंगी ७५ वर्षें पूर्ण केलेल्या सभासदांचा शाल व श्रीफळ देऊन सन्मान करण्यात आला. दरम्यानच्या काळात संघटनेने रत्नागिरी-कोल्हापूर येथील पूरग्रस्तांना, तसेच कोरोना विषाणूच्या माहारामारीत बाधित झालेल्या नागरिकांना तहसीलदार डहाणू यांच्या विनंतीनुसार मोठी मदत केली आहे, अशी माहिती संघटनेचे बोर्डी शाखेचे अध्यक्ष भालचंद्र चुरी यांनी प्रास्ताविक भाषणात दिली. सभेचे अध्यक्ष हरिश्‍चंद्र वझे व प्रमुख अतिथी मारुती वाघमारे यांनी भावी काळात निवृत्त कर्मचाऱ्यांना भेडसावणाऱ्या समस्या सोडवण्याच्या दृष्टीने सुरू असलेल्या प्रक्रियेबाबत सविस्तर माहिती दिली. कार्यक्रमाचे सूत्रसंचालन दिनकर राऊत, शारदा राऊत यांनी केले.