सकाळ वृत्तसेवा
ठाणे, ता.२४ : देखभाल-दुरुस्तीच्या नावाने राज्यात भारनियमन सुरू असल्याचा आरोप करत भाजपने ठाण्यात रविवारी कंदील आंदोलन केले. वागळे इस्टेट येथील महावितरणच्या कार्यालयाबाहेर जोरदार घोषणाबाजी करत वीज ग्राहकांकडून वसूल करण्यात येत असलेली सुरक्षा अनामत रकमेचा निर्णय रद्द करण्याची मागणीही यावेळी करण्यात आली.
जिल्हाध्यक्ष आमदार निरंजन डावखरे आणि आमदार संजय केळकर यांच्या नेतृत्वाखाली भाजप कार्यकर्त्यांनी महावितरण कंपनीच्या वागळे इस्टेट येथील कार्यालयाबाहेर कार्यकर्त्यांनी महाविकास आघाडी सरकारच्या निषेधाच्या घोषणा दिल्या. तसेच राज्यातील जनतेला भारनियमनात ढकलल्यासंदर्भात निषेध व्यक्त केला. या आंदोलनात भाजपचे शहर सरचिटणीस मनोहर सुखदरे, माजी नगरसेवक भरत चव्हाण, रमेश आंब्रे, बाळा केंद्रे, वीरसिंग पारछा, कृष्णा भुजबळ, विक्रम भोईर, ओमकार चव्हाण, भाजयुमोचे शहराध्यक्ष सारंग मेढेकर, महिला आघाडीच्या श्रुती महाजन, स्वप्नाली साळवी, श्रुतिका मोरेकर, सुषमा ठाकूर आदी सहभागी झाले होते.