भिवंडी : पवित्र महिना रमजाननिमित्ताने शहरातील विविध ठिकाणी सामाजिक संस्था व राजकीय पक्षांच्या वतीने रोजा इफ्तारचे कार्यक्रम आयोजित केले जात आहेत. भिवंडी शहरात परिमंडळ- २ अंतर्गत निजामपुरा पोलिस व शांतीनगर पोलिस ठाण्याच्या वतीने वेगवेगळ्या ठिकाणी मुस्लिम बांधवांसाठी रोजा इफ्तार पार्टीचे रविवारी सायंकाळी आयोजन करण्यात आले होते. या वेळी शहरातील मान्यवरांसह मुस्लिम बांधव मोठ्या संख्येने उपस्थित होते.

सध्या मुस्लिम समाज बांधवांचा पवित्र रमजान महिना सुरू असून एकात्मता, भाईचारा या भूमिकेतून शहरातील विविध पोलिस ठाण्याच्या वतीने रोजा इफ्तार पार्टीचे आयोजन त्यांचा कार्यक्षेत्रात केले जात आहे. पोलिस उपायुक्त योगेश चव्हाण यांच्या मार्गदर्शनाखाली निजामपुरा पोलिस ठाण्याच्या वतीने मुस्लिम बांधवांसाठी रोजा इफ्तार हा कार्यक्रम सायंकाळी बुबेरे हॉल सभागृहात आयोजित केला होता. निजामपुरा पोलिस ठाण्याचे वरिष्ठ पोलिस निरीक्षक नरेश पवार, दीप बने यांनी हा कार्यक्रम आयोजित केला होता. या वेळी अतिथी म्हणून पालिका उपमहापौर इमरान खान, माजी महापौर गटनेते विलास पाटील, सहाय्यक पोलिस आयुक्त सुनील वडके, माजी नगरसेवक तारीक फारूकी, शिवसेनेचे अल्पसंख्याक विभागाचे अध्यक्ष तुफेल फारूकी, मलिक मोमीन व अन्य मान्यवर, तसेच पोलिस कर्मचारी व अधिकारी वर्ग उपस्थित होते. याशिवाय शांतीनगर पोलिस ठाण्याचे पोलिस अधिकारीही यावेळी उपस्थित होते.