नवी मुंबई: सिडकोने पनवेल महापालिकेला तयार करून दिलेले जम्बो कोविड केअर केंद्र महापालिकेने सिडकोला परत केले असताना नवी मुंबई महापालिकेने मात्र जम्बो कोविड केअर केंद्र सध्‍या सुरू ठेवण्याचा निर्णय घेतला आहे. शहरातील कोविड रुग्णांची संख्या नगण्य असली, तरी येत्या जून महिन्यांत रुग्ण वाढीचा धोका लक्षा घेता हे केंद्र तूर्तास सुरू ठेवण्याचा पालिकेचा विचार आहे. मात्र या कोविड केअर केंद्रासाठी सिडकोतर्फे महापालिकेच्या मागे भाडे भरण्यासाठी तगादा लावला आहे.

नवी मुंबई शहरात मार्च २०२०ला कोविडच्या रुग्णाचा शिरकाव झाला. संपूर्ण शहर साथीच्या भोवऱ्यात आल्यानंतर रुग्णांना उपचारार्थ दाखल करण्यास खाटा कमी पडू लागल्या. रुग्णालये भरून गेली. आयसीयू, ऑक्सिजन आणि व्हेन्टीलेटर आदी सुविधांची समस्या निर्माण झाली. त्यामुळे महापालिकेने पुढाकार घेत वाशीतील सिडकोच्या भव्य प्रदर्शन केंद्रात जम्बो कोविड रुग्णालय सुरु करण्याचा निर्णय केला. अवघ्या काही दिवसांत युद्ध पातळीवर हे केंद्र तयार करण्यात आले. ७ जून २०२० ला वाशी जम्बो कोविड केअर केंद्रात पहिला रुग्ण दाखल करण्यात आला.

सुरुवातीला ६०० खाटांचे असणाऱ्या या केंद्रात हळूहळू खाटांची संख्या वाढवत १२०० पर्यंत नेण्यात आली. जून २०२० ते २०२२ पर्यंत सलग दोन वर्षे या जम्बो कोविड केअर केंद्राने शहराला एखाद्या खासगी रुग्णालयालाही लाजवेल अशा मल्टिस्पेशालिटी सुविधा दिल्या. २८ मार्चला शेवटच्या कोविड रुग्ण बरा होऊन या केंद्रातून घरी परतला. तेव्हापासून कोविडची तिसरी लाट ओसरल्यानंतर आता या केंद्रात एकही रुग्ण शिल्लक नाही.
ेगेला महिनाभर केंद्रात कोविडचा एकही रुग्ण आला नाही. आयुक्त अभिजित बांगर यांनी शहरातील इतर कोविड केअर केंद्र आणि कोविड रुग्णालये बंद केली आहेत. रुग्ण उपचारार्थ दाखल नसतानाही महापालिकेचा त्यावर सुरू असणारा खर्च पाहता प्रशासनातर्फेही काही खाटा कमी करून केंद्रातील काही जागा सिडकोच्या ताब्यात देण्याचा विचाराधीन आहे. परंतु जून महिन्यापर्यंत रुग्ण वाढीची संभाव्य धोका नजरेसमोर ठेवून पालिकेने सावध पवित्र घेतला आहे.

२२ हजारांपेक्षा जास्त रुग्णांना सेवा
वाशीतील जम्बो कोविड केअर केंद्रात ७ जून २०२० ला पहिला रुग्ण दाखल झाला. कोविडच्या तीनही लाटांमध्ये आत्तापर्यंत २२ हजार ७४१ रुग्णांना सेवा देण्यात आली. त्यापैकी १४ हजार १३० नॉन ऑक्सिजनवरील रुग्ण होते, तर ८ हजार ६११ रुग्ण हे ऑक्सिजनवर होते. यात ४५३ लहान मुलांचा समावेश आहे.

वाशीतील जम्बो कोविड केअर केंद्रातील काही खाटा कमी करून मोकळी जागा सिडकोला देण्याचा विचार सुरु आहे. रुग्णवाढीचा अंदाज लक्षात घेता जून महिन्यांपर्यंत केंद्राबाबत निर्णय घेतला जाईल.
अभिजित बांगर, आयुक्त, नवी मुंबई

पनवेल पालिकेला कोविड केंद्र केले परत
कळंबोली येथील कपास निगमच्या गोदामात सिडकोतर्फे पनवेल महापालिकेला तब्बल ५० कोटी रुपये खर्च करून जम्बो कोविड केअर केंद्र सुरू करून दिले होते. ऑक्सिजन, व्हेन्टीलेटर आणि आयसीयूच्या खाटांचे नियोजन करण्यात आले आहे. परंतु या केंद्राचा एकही दिवस वापर न करता पालिकेने हे केंद्र सिडकोला परत केले आहे. अशा परिस्थितीत या केंद्राचे करायचे काय असा प्रश्न सिडकोसमोर पडला आहे.