पाली, ता. २८ (वार्ताहर) : सुधागड तालुक्यातील ताडगाव ग्रामपंचायत कार्यालयाची इमारत पूर्णपणे कोलमडली आहे. पावणे तीन वर्षांपूर्वी झालेल्या निसर्ग चक्रीवादळामुळे हे कार्यालय कोसळले आहे. आजतागायत येथे कोणतीही नवीन इमारत न बांधता भाड्याच्या अवघ्या दोन खोल्यांमध्ये ग्रामपंचायतीचा कारभार सुरू आहे. त्यामुळे येथे कामानिमित्त येणारे ग्रामस्थ, कर्मचारी व लोकप्रतिनिधींची प्रचंड गैरसोय होत आहे.
सुरुवातीला जिल्हा परिषद शाळेतून ग्रामपंचायतीचा कारभार सुरू होता. त्या वेळी कोरोनामुळे शाळा बंद होत्या; मात्र शाळा सुरू झाल्यावर गावातील एका घरातील दोन खोल्या भाड्याने घेऊन तिथे ग्रामपंचायतीचा कारभार सुरू आहे. ग्रामपंचायतीमार्फत जिल्हा परिषद उपमुख्य कार्यकारी अधिकारी, तत्कालीन जिल्हा परिषद अर्थ व बांधकाम सभापती, जिल्हाधिकारी व पाली-सुधागड पंचायत समिती कार्यालयाकडे ग्रामपंचायत कार्यालय इमारत बांधून देण्यासंदर्भात विनंती अर्ज केले आहेत. शिवाय ग्रामपंचायत मासिक सभेत ठरावही घेण्यात आला होता; मात्र याकडे आजतागायत कोणीही लक्ष दिलेले नाही. यामुळे येथील व आजूबाजूच्या गाव आणि वाड्यातील ग्रामस्थ, कर्मचारी व लोकप्रतिनिधी अक्षरशः हतबल झाले आहेत. नक्की दाद कोणाकडे मागावी, हा प्रश्न त्यांना पडला आहे.

ग्रामपंचायत कार्यालय हे गावातील पहिले घर असते; मात्र या घराची अशी दुरवस्था होणे आणि याकडे प्रशासनाने दुर्लक्ष करणे हे खेदजनक आहे. यामुळे गावची शोभा लोप पावत आहे. सरकारने लवकर येथे सुसज्ज व सोईसुविधांनी युक्त इमारत बनवून द्यावी.
- सचिन साठे, ग्रामस्थ, ताडगाव

कार्यालय दुरुस्ती व नवीन कार्यालय बांधून देण्यासंदर्भात ग्रामपंचायतीमार्फत संबंधित सर्व शासकीय अधिकारी व कार्यालयांना वारंवार पत्रव्यवहार करण्यात आला आहे. नुकताच पदभार स्वीकारल्यावर यासंदर्भात मी सुद्धा पाठपुरावा करत आहे.
- करुणा साठे, सरपंच, ताडगाव

पाली : ताडगाव ग्रामपंचायतीची दुरवस्था झालेली इमारत.