अलिबाग : मुरूड तालुक्यातील काशीद समुद्रकिनारी गुरुवारी (ता. ६) आईसह मुलाचा समुद्रात बुडून मृत्यू झाल्याची घटना समोर आली होती. सहा दिवसांनंतर या घटनेची वस्तुस्थिती पोलिस तपासातून समोर आली असून ही दुर्घटना नसून आर्थिक विवंचनेतून आत्महत्या केली असल्याचे पोलिसांचे म्हणणे आहे.

काशीद समुद्रात डोर्थी बेंजामिन फेड्रिक (वय ७३) आणि विजय लिओनेल अल्फ्रेड (वय ४६) हे मूळचे तमिळनाडूतील असून ते काही वर्षांपासून कल्याण तालुक्यात वास्तव्यास होते. पोलिस उपनिरीक्षक प्रकाश सकपाल यांनी सांगितले की, विजय यांची कोरोना काळात नोकरी गेली होती, तसेच दुसरी नोकरी शोधली होती; मात्र, काही कारणास्तव ती सुद्धा गेल्याने त्यांना आर्थिक टंचाई भासू लागली. यातूनच या दोघांनीही आत्महत्येचा विचार करून गुरुवारी सकाळी त्यांच्या राहत्या घरून ते काशीदला निघाले. निघण्यापूर्वी त्यांनी घरातील वस्तू विजयच्या मैत्रिणीकडे दिल्या होत्या. दोघेही गावाला जात असल्याने त्या वस्तू तिच्याकडे ठेवण्यास दिल्या, असा मैत्रिणीचा समज झाला होता. त्याचप्रमाणे विजयने आत्महत्येपूर्वी मोबाईल आणि लॅपटॉप फॉरमॅट करून ठेवला होता. काशीद येथे माय-लेक कार घेऊन आल्यावर सायंकाळी ७.४५ वाजता चिकणी समुद्र किनाऱ्यावरील कावडा या भागात बुडाले होते. त्यांचा मृतदेह कोणीही ताब्यात न घेतल्याने वाशी येथील शवागृहात ठेवण्यात आले आहेत.