बहिरीदेवाच्या पालखी सोहळ्याला भाविकांचा प्रतिसाद
अलिबाग, ता. २९ : अलिबाग तालुक्यातील बहिरीदेवाच्या पालखी सोहळ्याला भाविकांनी मोठ्या प्रमाणावर हजेरी लावली होती. यावेळी विविध धार्मिक कार्यक्रम मोठ्या उत्‍साहात पार पडले.
बहिरीचा पाडा येथे प्रसिद्ध देवस्थान बहिरीदेव मंदिर प्रख्यात आहे. पंचक्रोशीतील भाविकांचे श्रद्धास्थान आहे. पहाटे महापूजा, अभिषेक आरती झाल्यानंतर दिवसभरात हजारोंच्या संख्येने भाविकांनी दर्शनाचा लाभ घेतला. दुपारी दोनच्या सुमारास भव्य उंच काट्यांच्या स्पर्धा पार पडल्‍या. रात्री सांस्कृतिक कार्यक्रम कलावंतांनी सादर केला. या कार्यक्रमाला रसिक प्रेक्षकांचा मोठा प्रतिसाद मिळाला. तसेच मोठ्या प्रमाणात महिला भाविकांनी उपस्‍थित लावली होती. पालखीचे वैशिष्ट्य म्हणजे पालखीच्या पुढे भाविक काटेरी पेरी पाठीवर मारतात. यावेळी पाठ रक्तबंबळ होते, मात्र भाविकांना आजवर कुठल्याही वेदना जाणवल्या नसल्‍याचे सांगण्यात येत आहे. हा सोहळा पाहण्यासाठी रायगड जिल्ह्यातून भाविक आवर्जून येतात.