अलिबाग, ता. १४ : तालुक्यातील सोमवारी आलेल्या अवकाळी पावसाने सोगाव विभागातील शेतकऱ्यांचा आंबा, भाजीपाला, वीटभट्टीधारक, बांधकाम व्यावसायिक व इतर सर्व सामान्य नागरिकांचे मोठ्या प्रमाणात नुकसान झाले आहे. काही मिनिटांच्या पावसाने जनजीवन विस्कळीत केले, शिवाय परिसरातील वीजपुरवठा खंडित झाल्याने नागरिकांची गैरसोय झाली.
नुकतेच हवामान खात्याने अवकाळी पावसाचा अंदाज व्यक्त केला होता, तो काहीसा खरा ठरला. सोमवारी (ता.१३ ) दुपारी चारच्या सुमारास सोगाव विभागात अचानक वातावरण बदल होत वादळी वाऱ्यासह पावसाने झोडपून काढले. त्‍यामुळे आंबा, भाजीपाला, वीटभट्टी व्यावसायिकांच्या कच्चा विटांचे, बांधकाम साहित्याचे मोठ्या प्रमाणात नुकसान झाले. वादळी वाऱ्याने वीटभट्टी व बांधकाम सुरू असलेल्या ठिकाणी उघड्यावर राहणाऱ्या कामगारांच्या तात्पुरत्या असलेल्या झोपड्यांचे छप्पर उडाल्याने जीवनावश्यक वस्तू भिजून संसार उघड्यावर आले. आंबा, काजूची फळगळती झाल्‍याने सरकारने सोगाव विभागातील नुकसानीचे त्वरित पंचनामे करून भरपाई देण्याची मागणी रायगड जिल्हा काँग्रेस पक्षाचे उपाध्यक्ष सुनील थळे यांनी केली.

अलिबाग : सोगावमध्ये मजुरांच्या झोपड्यांचे छप्पर उडाले.