सकाळ वृत्तसेवा
अलिबाग, ता. ५ : शेकाप जिल्हा महिला आघाडी प्रमुख चित्रलेखा पाटील यांचा अपमान केल्याप्रकरणी महिला कार्यकर्त्यांकडून अलिबाग तालुक्यात शिंदे गटाच्या कार्यकर्त्यांबद्दल तीव्र संताप व्यक्त करण्यात आला. शिंदे गटाचे जिल्हाध्यक्ष राजा केणी यांनी केलेल्या चुकीच्या वर्तनामुळे महिला नेत्या आक्रमक झाल्या असून त्‍यांनी मोर्चा काढून निषेध नोंदवला.
शेकापच्या महिला युवा कार्यकर्त्यांनी पेझारी येथील निषेध मोर्चात राजा केणींसह सचिन धुमाळ यांच्यावर टीका केली. त्या म्हणाल्या, शिंदे गटाचे जिल्हाध्यक्ष राजा केणी यांचे वक्तव्य महिलांचा अपमान करणारे आहे. सध्या शिंदे गटाचे लोक बोलण्याचे तारतम्य पाळत नाही. शेतकरी आणि महिलांचा अपमान करणे हाच त्‍यांचा अजेंडा असल्‍याची टीका भैरवी जाधव यांनी केली. शेकाप तालुका महिला आघाडीच्या वतीने शुक्रवारी सायंकाळी पेझारी नाका येथे राजा केणी व सचिन धुमाळ यांच्याविरोधात निषेध मोर्चा काढला. मोर्चाला मोठ्या संख्येने महिला सहभागी झाल्या होत्या. या वेळी सहाय्यक पोलिस निरीक्षक संतोष दराडे यांना महिलांकडून निवेदन देण्यात आले. तसेच, महिलांचा अनादर केल्याप्रकरणी शिंदे गटाच्या कार्यकर्त्यांनी चित्रलेखा पाटील यांची जाहीर माफी मागावी, अन्यथा त्यांच्याविरोधात गुन्हे दाखल करण्याची मागणी कार्यकर्त्यांकडून करण्यात आली.

अलिबाग ः शेकापच्या महिला कार्यकर्त्यांनी मोर्चा काढला होता.