अलिबाग, ता. २५ (वार्ताहर) ः उपवासाच्या पदार्थांमध्ये आवडीने खाल्ले जाणारे रताळी महाशिवरात्रीनिमित्ताने बाजारात दाखल झाली आहे. रायगडमध्ये सध्या नाशिक, अहमदनगर जिल्ह्यातून रताळी दाखल झाली आहेत.
चवीला गोड असलेल्या रताळ्यांना उपवासांच्या काळात मागणी असल्‍याचे लक्षात घेउन दोन-तीन महिने आधीच त्‍याची लागवड केली जाते. नाशिक, अहमदनगर जिल्ह्यातून सध्या ट्रकमधून रताळी अलिबागच्या बाजारात दाखल झाली आहेत.
कोनफळ, कणकं, भुईमुगाच्या शेंगा याबरोबरच उन्हाळी फळांची आवक वाढू लागली आहे. टरबूज, खरबूज, संत्री या फळांची आवक वाढली आहे. संत्र्याला १०० रुपये किलो दर मिळत आहे. आणखी पंधरा दिवसांत आवक सुरू राहणार असल्‍याचे व्यापाऱ्यांकडून सांगण्यात येत आहे. सफरचंद, पपई व चिक्कूचे भाव सध्या स्थिर आहेत. टरबूज ५० रुपये किलो, तर खरबूज ८० रुपये किलोने दराने मिळत आहे. अॅपल बोरची आवक वाढली असून ३० रुपये किलोने विक्री होत आहे. डाळिंबाला सध्या चांगले भाव मिळत आहे.