झिराडमधील विद्यार्थ्यांना सायकलवाटप
सकाळ वृत्तसेवा
अलिबाग, ता. १३ : दिलीप ऊर्फ छोटम विठ्ठल भोईर चॅरिटेबल ट्रस्टच्या वतीने शंभरहून अधिक शाळकरी विद्यार्थ्यांना शनिवारी (ता. १२) मोफत सायकली देण्यात आल्या. दिलीप भोईर यांच्या हस्ते हा सोहळा पार पडला. झिराड व परिसरातील विद्यार्थ्यांना शाळेत जाण्यासाठी दोन ते तीन किलो मीटरची पायपीट करावी लागत होती; मात्र हा प्रश्न आता कायमचा सुटणार आहे. शाळेत जाण्यासाठी विद्यार्थ्यांना सायकलचा आधार मिळणार आहे.
परिषद माजी समाजकल्याण सभापती दिलीप भोईर यांच्या पुढाकाराने राबवलेल्या या उपक्रमामुळे शिक्षणाच्या मार्गाला गती मिळाली आहे. या कार्यक्रमाच्या वेळी झिराडच्या सरपंच दर्शना भोईर, उपसरपंच संध्या गावडे, महेश माने, अशोक थळे, रवींद्र म्हात्रे, हरेश भोईर, सुजाता माने आदी मान्यवर, ग्रामपंचायत सदस्य, साई क्रीडा महिला मंडळाचे पदाधिकारी, कार्यकर्ते, महिला, पालक व विद्यार्थी मोठ्या संख्येने उपस्थित होते. ग्रामीण भागातील मुलांना दर्जेदार शिक्षण मिळावे, म्हणून शाळा-महाविद्यालयात जाण्यासाठी सायकल हे गतीचे प्रतीक आहे. हे जाणून ग्रामीण भागातील गरीब तसेच गरजू मुली व मुलांना सामाजिक बांधिलकीतून सायकली देण्याचे काम दिलीप भोईर यांनी चॅरिटेबल ट्रस्टच्या माध्यमातून केले. त्यांच्यामुळे विद्यार्थ्यांच्या शिक्षणाचा मार्ग मोकळा होण्यास चालना मिळाली आहे.