धोक्‍याचा बावटा उतरवला, तरी जलवाहतुकीत व्यत्‍यय
अजंठा लाँचसेवाबाबत अनिश्चितता

सकाळ वृत्तसेवा
अलिबाग, ता. ८ : वादळी वाऱ्यामुळे बंदरात लावलेला तीन नंबरचा बावटा गुरुवारी (ता. ८) दुपारी उतरवण्यात आला. वादळाचा जोर कमी झाल्यामुळे खोळंबून राहिलेली मांडवा-गेवटे जलवाहतूक सुरू झाली असून, प्रवाशांनी जलप्रवास सुरू केला आहे. सध्या उन्हाळी सुट्टीनिमित्त मुंबईतील पर्यटक मोठ्या प्रमाणात जलमार्गाने अलिबाग, मुरूडकडे येत आहेत; मात्र हवामानात अचानक बदल झाल्यामुळे अजंठा लाँचसेवेच्या फेऱ्या बंद कराव्या लागल्या होत्या. तर पीएनपी, मालदारच्या फेऱ्या रद्द कराव्या लागल्या होत्या. दोन दिवसांच्या वादळी स्थितीमुळे प्रवाशांचा खोळंबा झाला होता.
चार दिवसांपासून सायंकाळच्या दरम्यान ताशी ३० ते ४० किमी वेगाने वादळी वारे आणि पावसाच्या सरी कोसळत होत्या. गुरुवारी सकाळपासून जिल्ह्यात पावसाची स्थिती कायम होती. शनिवार (ता. ३) दुपारी ४ वाजल्यापासून सुरक्षेच्या कारणास्तव गेटवे-मांडवा मार्गावरील अजंठा कंपनीच्या बोटींची जलवाहतूक सेवा बंद करण्यात आली. त्यामुळे अलिबागकडे येणाऱ्या पर्यटक व प्रवाशांचे हाल झाले. हे सातत्य गुरुवारपर्यंत कायम होते. रविवारी हजारो प्रवासी गेटवे येथे फेरीबोटीची वाट पाहात होते.
बंदर विभागाने अलीकडेच सुरक्षेच्या कारणास्तव प्रवासीसंख्येवर निर्बंध आणले आहेत. काही दिवसांपूर्वीच अंजठा फेरीबोटीमध्ये पाणी शिरण्याची घटना घडली होती. या दुर्घटनेतून प्रवासी थोडक्यात बचावले. अजंठा कंपनीच्या बोटी लाकडी बनावटीच्या आहेत, सिंगल इंजिनच्या बोटींचा वेगही कमी आहे. प्रवाशांचे जीव धोक्यात येऊ नये, यासाठी बंदर विभागाने या उपाययोजना केल्या होत्या.

गुरुवारी दुपारनंतर जलवाहतूक पूर्ववत सुरू झाली. परंतु अजंठा कंपनीच्या फेऱ्यांवर अनिश्चितता कायम आहे. वादळाचा जोर कमी होत असल्याच्या सूचना हवामान विभागाने दिल्यानंतर बंदरात लावलेला वादळाची सूचना देणारा तीन नंबरचा बावटा उतरवण्यात आला.
- आशीष मानकर, बंदर निरीक्षक, मांडवा