महाराष्ट्राच्या बीच कबड्डी संघांचे सराव शिबिर सुरू

अलिबाग, ता. ३१ ः राष्ट्रीय बीच कबड्डी स्पर्धेसाठी निवडण्यात आलेल्या महाराष्ट्राच्या पुरुष व महिला संघांच्या सरावाला वरसोली, अलिबाग येथे प्रारंभ झाला. भारतीय हौशी कबड्डी महासंघाच्या मान्यतेने आंध्र कबड्डी असोसिएशनच्या यजमान पदाखाली ५ ते ८ जून या कालावधीत मंगीनापुढी बीच, मचीलीपटनम्, आंध्रप्रदेश येथे बारावी वरिष्ठ पुरुष व महिला गट बीच राष्ट्रीय कबड्डी स्पर्धा आयोजित करण्यात आलेली आहे. यासाठी महाराष्ट्राचे पुरुष व महिला संघ निवडण्यात आले आहेत.
या दोन्ही संघांचे सराव शिबिर अलिबाग तालुक्यातील वरसोली समुद्रकिनाऱ्यावर आयोजित करण्यात आले आहे. शनिवारी (ता. ३१) या सराव शिबिराचे उद्‍घाटन रायगड जिल्हा कबड्डी असोसिएशनचे सहकार्यवाह जे. जे. पाटील यांच्या हस्ते करण्यात आले. छत्रपती पुरस्कारविजेते राजेश पाडावे, महिला संघाच्या प्रशिक्षक लता पांचाळ, पुरुष संघाचे प्रशिक्षक अ‍ॅड. प्रथमेश पाटील, रायगड जिल्हा कबड्डी असोसिएशनचे सदस्य जनार्दन पाटील, राष्ट्रीय पंच विनोद पाटील, कबड्डीपटू सागर गायकर, प्राण भगत, सुधीर पाटील आदी उपस्थित होते. ज्या ज्या वेळी रायगडमध्ये महाराष्ट्राच्या संघाचे प्रशिक्षण शिबिर आयोजित करण्यात आले तेव्हा महाराष्ट्राच्या संघांनी चांगली कामगिरी केली आहे. या वेळीदेखील महाराष्ट्राचे संघ राष्ट्रीय स्पर्धेत चांगली कामगिरी करतील, असे जे. जे. पाटील म्हणाले.