वन विभागाकडून राखीव परिसराची स्‍वच्‍छता
पाली, ता. २५ (वार्ताहर) ः म्हसळा येथील देहेन वन रोपवाटिकाजवळील राखीव वन परिसरात रोहा वन विभागामार्फत नुकतेच स्वच्छता अभियान राबविण्यात आले आहे. या वेळी पर्यटकांनी वन परिसरात स्वच्छता राखण्याचे आवाहन वरिष्ठ वन अधिकाऱ्यांकडून करण्यात आले.
उपवनसंरक्षक शैलेंद्रकुमार जाधव, सहाय्यक उपवनसंरक्षक रोहित चौबे आणि म्हसळा वन परिक्षेत्र अधिकारी संजय पांढरकामे यांच्यासह माणगावचे वन्यजीव रक्षक शंतनू कुवेसकर, सहकारी मित्र उमेश देशमुख व म्हसळा वन विभागातील वनपाल आणि वनरक्षक यांची या अभियानास उपस्थिती होती. वन परिसरातून गोळा केलेल्या प्लॅस्टिकच्या बाटल्या, व इतर कचरा, मद्याच्या बाटल्या रीसायकलिंगसाठी देण्यात आल्या आहेत. हे अभियान कोणत्याही पूर्वनियोजनाविना वन परिसराची पाहणी करत असताना वनाधिकाऱ्यांकडून राबवण्यात आल्याचे सांगण्यात आले. रायगड जिल्ह्यात पावसाळी निसर्ग पर्यटन तसेच समुद्रकिनारी मोठ्या प्रमाणात पर्यटन होत असते, येथे येणारे पर्यटक मोठ्या प्रमाणात कचरा करतात. यामुळे येथील जैवविविधतेला धोका पोहोचत आहे. त्‍यामुळे हे स्‍वच्‍छता अभियान राबविण्यात आले आहे.
.................
रायगड जिल्ह्यात दक्षिणेकडील रोहा, माणगाव, तळा, महाड, पोलादपूर, म्हसळा, श्रीवर्धन व मुरूड या आठ तालुक्यांचा समावेश रोहा वन विभागाच्या कार्यक्षेत्रात होतो. कार्यक्षेत्रातील वन परिसर जैवविविधतेने अतिशय समृद्ध व संवेदनशील असून, येथील वनसंपदेला आपल्याकडून कोणत्याही प्रकारची हानी पोहोचणार नाही याची खबरदारी पर्यटकांकडून घेण्याचे अपेक्षित आहे, वन विभाग वन परिसरात स्वच्छता राखून येथील नैसर्गिक अधिवास अबाधित राखत वनसेवेसाठी तत्पर आहे.
-शैलेंद्रकुमार जाधव (भा.व.से.), उपवनसंरक्षक, रोहा.