सकाळ वृत्तसेवा
अलिबाग, ता. ४ : स्वामित्व योजनेअंतर्गत गावठाण भूमापनाचा प्रकल्प राज्यात राबवला जात आहे. या योजनेंतर्गत रायगड जिल्ह्यातही एक लाख २४ हजार ३७९ लाभार्थ्यांना ९० हजार १७३ मिळकत पत्रिका मिळाल्या आहेत. त्यामुळे जागेचा मालकी हक्क प्राप्त झाल्याने अनेकांच्या हक्काच्या जागेसोबतच घराची स्वप्नपूर्ती झाली आहे.
रायगड जिल्ह्यात गावठाणातील मिळकतींचे सर्वेक्षण झालेले नाही. अशा गावठाणातील घरांचे, जमिनीचे अत्याधुनिक तंत्रज्ञानाच्या आधारे मोजणी केली जात आहे. गावठाणात राहणाऱ्या नागरिकांना मालकी अधिकार मिळावा, यासाठी स्वामित्व योजनेतून जागामालकाला जमीन आणि घरांचे मिळकतीचे नकाशे, मालमत्ता पत्रिका ड्रोनद्वारे भूमापन करून दिले जात आहेत. रायगड जिल्ह्यात एक हजार ६३४ गावे आहेत. यातील एक हजार ५३४ गावांचे ड्रोनद्वारे सर्वेक्षण झाले असून, फक्त १०० गावांचे सर्वेक्षण होणे शिल्लक आहे. उरण तालुक्यातील २८ गावांचे सर्वेक्षण बाकी असल्याचे जिल्हा भूमी अभिलेख अधीक्षक सुनील इंदलकर यांनी सांगितले.
-----
‘स्वामित्व योजने’मुळे दिलासा
गावांमध्ये घरे बांधण्यासाठी गावठाण जागा दिलेली असते. ही जागा शासनाची असल्याने त्यावर मालकी हक्क बजावता येत नाही. त्यामुळे बॅंकेचे कर्ज मिळवण्यासारख्या अडचणी घरपट्टीधारकांना येत असतात. त्यामुळेच २०१९ मध्ये शासनाने स्वामित्व योजनेच्या माध्यमातून गावठाणातील जागेची मालकी घरपट्टीधारकांना बहाल करण्यात येत आहे.
----
स्वामित्व योजनेचे साध्य लक्षांक
जिल्ह्यातील गावे - १,६३४
ड्रोनद्वारे सर्व्हे - १,५३४
एकूण लाभार्थी- १ लाख २४ हजार ३७१
मिळकत पत्रिका वाटप- ९० हजार १७३
----