मुंबई-गोवा महामार्गावर गणेशोत्सवादरम्यान जड वाहनांना वाहतूकबंदी
सकाळ वृत्तसेवा
अलिबाग, ता. २१ : गणेशोत्सवासाठी मूर्तींचे आगमन, गौरी-गणपती विसर्जन, परतीचा प्रवास आदींसाठी सार्वजनिक हितास्तव मुंबई-गोवा राष्ट्रीय महामार्गावर १६ टनापेक्षा जास्त वाहनांना बंदी करण्यात आली आहे. गणेशोत्सवाच्या पूर्वतयारीचा प्रवास म्हणून २३ ऑगस्ट रोजी मध्यरात्रीपासून ते २८ ऑगस्ट रोजी मध्यरात्री या कालावधीत ही वाहतूकबंदी असणार आहे. यात अवजड वाहने, ट्रक, मल्टीएक्सल, ट्रेलर, लॉरी आदी वाहनांचा समावेश आहे.
तसेच पाच व सात दिवसांच्या गणपतीचे विसर्जन, गौरी-गणपती विसर्जन आणि परतीच्या प्रवासासाठी ३१ ऑगस्ट आणि २ सप्टेंबर रोजी सकाळी ८ वाजेपासून मध्यरात्रीपर्यंत, अनंत चतुर्दशी ११ दिवसांचे गणपती विसर्जन, परतीच्या प्रवासाकरिता ६ सप्टेंबर रोजी सकाळी ८ वाजेपासून ते ७ सप्टेंबर रोजी रात्री ८ वाजेपर्यंत या कालावधीत जड वाहतुकीस बंदी राहील.

यांना बंदीतून मुभा
हे निर्बंध जेएनपीए बंदर ते जयगड बंदर येथून आयात-निर्यात मालाची वाहतूक करणारी वाहने, दूध, पेट्रोल, डिझेल, स्वयंपाकाचे गॅस सिलिंडर, औषधे, लिक्वीड मेडिकल ऑक्सिजन, अन्नधान्य, भाजीपाला व नाशवंत माल आदी जीवनावश्यक वस्तूंची वाहतूक करणाऱ्या वाहनांना लागू राहणार नाही. तसेच मुंबई-गोवा राष्ट्रीय महामार्गाच्या रस्ता रुंदीकरण, रस्ता दुरुस्ती कामकाज आणि साहित्य, माल ने-आण करणाऱ्या वाहनांनाही ही बंदी लागू राहणार नाही.