भेकर मांस प्रकरणात राष्ट्रवादीच्या नेत्यावर गुन्हा
अलिबाग, ता. २६ : भेकर जातीच्या संरक्षित वन्यजीव प्राण्याचे मांस बाळगल्याप्रकरणी राष्ट्रवादीचे नेते जयेंद्र भगत यांच्याविरोधात वन्यजीव संरक्षण अधिनियम १९७२ नुसार वन गुन्हा नोंदवण्यात आला आहे. गुरुवारी (ता. २३) सायंकाळी भगत यांच्या स्वयंपाकघरात मांस आढळून आले होते.
याप्रकरणी वन विभागासह पोलिस अधीक्षक आंचल दलाल यांच्या मार्गदर्शनाखाली तयार केलेल्या पथकाकडून दोन दिवसांपासून तपास सुरू होता.
मांडव्याचे पोलिस निरीक्षक सोमनाथ लांडे, अलिबाग पोलिस ठाण्याच्या सहाय्यक पोलिस निरीक्षक सरिता मुसळे, तसेच इतर पोलिस अधिकारी सहभागी होते. घराची झाडाझडती घेताना किचनमधील फ्रिजमध्ये संरक्षित वन्य प्राण्याचे मांस सापडले आहे. हा मुद्देमाल जप्त करून पुढील कारवाईसाठी वन परिक्षेत्र अधिकारी यांच्याकडे सुपूर्द करण्यात आला आहे. विक्रीसाठी आलेल्या एका व्यक्तीकडून हे मांस विकत घेतल्याची माहिती समोर आली आहे, मात्र हा प्रकार भगत यांच्या अडचणी वाढवणारा ठरला आहे.