फोटोग्राफर असोसिएशनची क्रिकेट स्पर्धा
अलिबाग, ता. २४ (बातमीदार) : फोटोग्राफीच्या व्यस्त कामातून विरंगुळा मिळावा तसेच जिल्ह्यातील फोटोग्राफर व व्हिडिओग्राफर एकत्र यावेत, या उद्देशाने रायगड जिल्हा फोटोग्राफर्स व व्हिडिओग्राफर्स असोसिएशनच्या वतीने कर्जत येथील मैदानावर मर्यादित षटकांच्या टेनिस क्रिकेट स्पर्धेचे आयोजन करण्यात आले. या स्पर्धेचे नियोजन कर्जत फोटोग्राफर्स असोसिएशनने अतिशय सुबक पद्धतीने केले होते.
स्पर्धेत पेण फोटोग्राफर्स संघाने प्रथम क्रमांक पटकाविला. कर्जत संघाने द्वितीय, रोहा संघाने तृतीय तर अलिबाग संघाला चौथ्या क्रमांकावर समाधान मानावे लागले. अष्टपैलू खेळाच्या जोरावर पेण संघाच्या शैलेश पाटील यांनी ‘मालिकावीर’चा मान मिळविला. अलिबागच्या राकेश शिर्के यांना उत्कृष्ट फलंदाज, पेणच्या विनोद बामुगडे यांना उत्कृष्ट गोलंदाज, तर रोहाच्या दीपक मोरे यांना उत्कृष्ट क्षेत्ररक्षक पुरस्कार देण्यात आला.
स्पर्धेचे उद्घाटन माजी नगराध्यक्षा सुवर्णा जोशी यांच्या हस्ते झाले. रायगड जिल्ह्यातील अलिबाग, पेण, कर्जत, खोपोली, रोहा, नागोठणे व महाड संघांनी या स्पर्धेत सहभाग घेतला.