रस्ता सुरक्षा अभियानांतर्गत नेत्र तपासणी शिबिर
सकाळ वृत्तसेवा
अलिबाग, ता. २५ : रस्ता सुरक्षा अभियानांतर्गत अलिबाग कॅम्प येथे उपप्रादेशिक परिवहन कार्यालय, पेण-रायगड यांच्या वतीने मोफत नेत्रतपासणी व सर्वसाधारण आरोग्य तपासणी शिबिराचे आयोजन करण्यात आले. हा उपक्रम उपप्रादेशिक परिवहन अधिकारी माधव सूर्यवंशी यांच्या मार्गदर्शनाखाली पार पडला.
शिबिरात वैद्यकीय अधिकारी डॉ. श्वेता कार्वेकर, डॉ. राजाराम हुलवान तसेच नेत्रचिकित्सा अधिकारी डॉ. श्रद्धा कुदळे यांनी नागरिकांची तपासणी केली. रायगड जिल्हा शल्यचिकित्सक कार्यालयाचे सहकार्य या उपक्रमाला लाभले. शिबिरात ९० नागरिकांची मोफत नेत्रतपासणी तर ७८ नागरिकांची सर्वसाधारण आरोग्य तपासणी करण्यात आली.
या वेळी वाहनचालक व मालकांना हेल्मेट व सीटबेल्टचे महत्त्व, गुड समॅरिटन नियम, गोल्डन अवर तसेच वाहन चालविताना मोबाईल वापर टाळण्याबाबत मोटार वाहन निरीक्षक सूर्यकांत गंभीर यांनी मार्गदर्शन केले. अशा जनजागृतीपर उपक्रमांमुळे रस्ता अपघातांचे प्रमाण कमी होण्यास मदत होणार आहे.