अखिल भारतीय पूर्व सैनिक सेवा परिषदेची कोकण प्रांत बैठक
रायगड जिल्ह्यातील उपक्रमांचे कौतुक; युवकांना भरती मार्गदर्शन व देशप्रेम जागृतीवर भर
अलिबाग, ता. १९ : परहूर येथे अखिल भारतीय पूर्व सैनिक सेवा परिषद कोकण प्रांताची वार्षिक सर्वसाधारण बैठक उत्साहात पार पडली. पालघर, ठाणे, मुंबई, नवी मुंबई आणि रायगड जिल्ह्यातील पदाधिकारी व माजी सैनिक मोठ्या संख्येने उपस्थित होते. बैठकीत विविध जिल्हाध्यक्षांनी आपल्या जिल्ह्यांचा कार्यआढावा सादर केला. राज्य संघटकांनी सिंधुदुर्ग व रायगड जिल्ह्यात राबविण्यात आलेल्या उपक्रमांची माहिती दिली. रायगडमध्ये नायक संतोष तावडे यांनी विद्यार्थ्यांना भारतीय सेनादलाच्या मोहिमांची माहिती देत युवकांमध्ये देशप्रेमाची भावना रुजवली तसेच अग्निवीर व अधिकारी भरतीसाठी मार्गदर्शनपर व्याख्याने आयोजित केल्याबद्दल त्यांचे विशेष कौतुक करण्यात आले.
कॅप्टन उमेश वाणी यांनी गेली नऊ वर्षे युवकांना पोलिस व सैन्य भरतीसाठी विनामूल्य शारीरिक प्रशिक्षण दिल्याबद्दल त्यांचा गौरव करण्यात आला. महाराष्ट्र-गोवा संघटन मंत्री रमेश देसाई, उपाध्यक्ष ब्रिगेडियर अजित श्रीवास्तव आणि कोकण प्रांत अध्यक्ष मेजर विनय देगावकर यांनी संघटनेच्या विस्तार व भावी उपक्रमांबाबत मार्गदर्शन केले. प्रमुख वक्ते रविकिरण काळे यांनी संघटनात्मक बळकटीवर भर दिला.
-----
छायाचित्र मजकूर (कॅप्शन) :
परहूर येथे पार पडलेल्या अखिल भारतीय पूर्व सैनिक सेवा परिषद, कोकण प्रांताच्या वार्षिक सर्वसाधारण बैठकीत उपस्थित मान्यवर, पदाधिकारी व माजी सैनिक.