नवघर शाळेत विज्ञानाचा जागर
प्रयोगांतून विद्यार्थ्यांना विज्ञानाची गोडी; ‘राष्ट्रीय विज्ञान दिन’ उत्साहात
सकाळ वृत्तसेवा
पाली, ता. १ : दैनंदिन जीवनातील विज्ञानाचा प्रत्यक्ष अनुभव देत नवघर येथील शाळेत ‘राष्ट्रीय विज्ञान दिना’निमित्त आयोजित विज्ञान सोहळा विद्यार्थ्यांसाठी संस्मरणीय ठरला. होमी भाभा विज्ञान शिक्षण केंद्र येथील सेवानिवृत्त प्रयोगशाळा सहाय्यक व सुधागडचे सुपुत्र करुण हंबीर यांनी विविध वैज्ञानिक प्रयोग सादर करत गुंतागुंतीच्या संकल्पना अत्यंत सोप्या व रंजक पद्धतीने समजावून सांगितल्या.
हवेचा दाब व पोकळी, जलशुद्धीकरण प्रक्रिया, आपकेंद्री व अभिकेंद्री बल, आवाजाच्या लहरींचा प्रवास तसेच ॲसिडसंबंधी प्रयोगांचे प्रात्यक्षिक विद्यार्थ्यांसाठी आकर्षण ठरले. प्रयोगांमागील निष्कर्ष विद्यार्थ्यांकडूनच काढून घेतल्याने त्यांचा सहभाग वाढला आणि विज्ञानाविषयी कुतूहल निर्माण झाले.
कार्यक्रमाच्या प्रारंभी मुख्याध्यापिका संगीता बैकर यांनी करुण हंबीर यांचे स्वागत केले. वृषाली गुरव यांनी परिचय करून दिला, तर शितल पाटील यांनी सूत्रसंचालन केले. केंद्रप्रमुख अनिल राणे, प्रशांत गुरव यांच्यासह शिक्षक व विद्यार्थी मोठ्या संख्येने उपस्थित होते. उपशिक्षक रुपाली लेंडवे व अंकिता जाधव यांनी परिश्रम घेतले.

चौकट
प्रयोगाधारित शिक्षणाची गरज
पाठांतरापेक्षा प्रत्यक्ष प्रयोगांमधून विज्ञान शिकवल्यास विद्यार्थ्यांमध्ये जिज्ञासा, निरीक्षणशक्ती व तर्कशक्ती वाढते, हा संदेश या उपक्रमातून प्रभावीपणे देण्यात आला.

फोटो ओळ, पाली, विविध प्रयोग दाखवताना करुण हंबीर व उपस्थित शिक्षक, मान्यवर व विद्यार्थी. (छायाचित्र, अमित गवळे)