भोंदूबाबा अशोक खरातचा अंनिसकडून निषेध
अंधश्रध्दा निर्मुलन समितीच्या वतीने निदर्शने; दोषींवर कारवाईची मागणी
सकाळ वृत्तसेवा
अलिबाग, ता. २६ : भोंदूबाबा म्हणून परिचित असलेले अशोक खरात यांच्या कृत्याच्या विरोधात अलिबागमध्ये निषेध व्यक्त करण्यात आला. अंधश्रध्दा निर्मूलन समितीच्या वतीने जिल्हाधिकारी कार्यालयासमोर बुधवारी (ता.२५) निदर्शने करण्यात आली. नितीन राऊत यांच्या नेतृत्वाखाली शांततामय मार्गाने हा निषेध व्यक्त करण्यात आला.
अशोक खरात प्रकरण सध्या राज्यात मोठ्या प्रमाणात चर्चेत आले आहे. त्याच्या विरोधात पोलिसांनी कारवाईदेखील सुरू केली आहे. नाशिक येथील भोंदू अशोक खरात याच्या कृत्याविरोधात रायगड जिल्ह्यात देखील प्रचंड संताप असून वेगवेगळ्या संस्था संघटनांकडून निषेध व्यक्त केला आहे. अंधश्रध्दा निर्मूलन समितीच्या वतीने अलिबागमध्ये बुधवारी खरातप्रकरणी निषेध व्यक्त करण्यात आला. अंधश्रध्दा निर्मूलन समितीचे सर्व पदाधिकारी, कार्यकर्ते अलिबागमधील जिल्हाधिकारी कार्यालयासमोर जमले. त्यांनी खरात विरोधात निषेध व्यक्त करीत निदर्शने केली. त्यानंतर जिल्हाधिकारी व पोलिस अधिक्षक यांना निवेदन देत खरात यांच्या विरोधात कारवाई रण्याची मागणी केली.