मारुती मंदिरात हनुमान जन्मोत्सव उत्साहात
पाली, ता. ३ (वार्ताहर) ः पाली शहरातील कसबे पेठ येथील ऐतिहासिक आणि प्राचीन श्री मारुती देवस्थान येथे यंदाचा हनुमान जन्मोत्सव भक्तिमय वातावरणात पार पडला. या मंदिरात दर्शनासाठी भाविकांनी पहाटेपासूनच मोठी गर्दी केली होती.
उत्सवाचे नियोजन अध्यक्ष अभिजीत चांदोरकर व विश्वस्त मंडळाच्या मार्गदर्शनाखाली करण्यात आले. धनंजय गद्रे यांनी आपल्या कीर्तनातून हनुमान जन्माची कथा आणि हनुमंताची महती भाविकांसमोर मांडली. तसेच, स्वरसाधना व सिद्धकला भजनी मंडळाच्या भजनांनी संपूर्ण परिसर भक्तिरसात न्हाऊन निघाला होता. महिलांसाठी आयोजित श्री चैत्रागौरी हळदीकुंकू कार्यक्रमाला प्रतिसाद मिळाला. यासोबतच श्री हनुमान तांडव आणि श्रीराम तांडव स्तोत्र पठणाने मंदिरातील वातावरण चैतन्यमय झाले होते. यावर्षीचे विशेष म्हणजे चांदीचा मुकुट परिधान केलेली श्रींची भव्य मूर्ती विलोभनीय दिसत होती.

३४० वर्षांचा ऐतिहासिक वारसा
शके १६०८ मध्ये स्थापन झालेले हे मंदिर पालीकरांच्या अस्मितेचे प्रतीक आहे. समर्थ रामदास स्वामींच्या परंपरेतील संतांनी या साडेपाच ते सहा फूट उंच भव्य मूर्तीची स्थापना केल्याचे सांगितले जाते. १८८६ आणि १९३६ मध्ये मंदिराचा जीर्णोद्धार झाला असला, तरी मूळ मूर्ती आणि आध्यात्मिक वारसा आजही जपला गेला आहे.

फोटो ओळ,
पाली ः हनुमान जन्मोत्सवानिमित्त आयोजित चैत्रागौरी हळदीकुंकू कार्यक्रमात पारंपरिक वेशभूषेत सहभागी झालेल्या पालीतील महिला.