गणरायाच्या साक्षीने राज्य प्रतीकांचा जागर
जैवविविधता संवर्धनाचा संदेश देणारा पर्यावरणपूरक देखावा
पाली, ता. १५ (वार्ताहर) : पर्यावरण संवर्धनाचा संदेश देत पालीतील अंबिके कुटुंबीयांनी यंदाही पर्यावरणपूरक घरगुती गणेशोत्सव साकारला आहे. यंदाच्या सजावटीची संकल्पना ‘राज्य प्रतीकांचा जागर, जैवविविधतेचा संकल्प’ अशी असून, महाराष्ट्राच्या राज्य प्रतीकांची माहिती आणि त्यांच्या संवर्धनाचा संदेश या देखाव्यातून देण्यात आला आहे.
शाडू मातीची गणेशमूर्ती साकारून त्यासोबत राज्य वृक्ष, राज्य फूल, राज्य प्राणी, राज्य पक्षी, राज्य माता, राज्य शस्त्र आणि राजभाषा इत्यादी राज्य प्रतीकांची माहितीपूर्ण मांडणी करण्यात आली आहे. प्रत्येक प्रतीकाचे वैशिष्ट्य, मान्यता मिळाल्याचे वर्ष आणि पर्यावरणीय महत्त्व माहितीफलकांद्वारे सांगण्यात आले आहे.
कागद, पुठ्ठा, दोरा, रंग तसेच टाकाऊ वस्तूंचा पुनर्वापर करून हा देखावा तयार करण्यात आला आहे. पाणी, फुले आणि हिरवाईच्या मांडणीमुळे देखाव्याला आकर्षक स्वरूप आले आहे. ‘निसर्ग जपा, जैवविविधता जपा आणि महाराष्ट्राचा वारसा जपा’ असा संदेशही देण्यात आला आहे. या उपक्रमाचा उद्देश नागरिकांना महाराष्ट्राच्या नैसर्गिक व सांस्कृतिक वारशाची माहिती देणे हा असल्याचे आयडॉल शिक्षक राजेंद्र अंबिके यांनी सांगितले.

क्यूआर कोडमधून माहिती
देखाव्यातील प्रत्येक राज्य प्रतीकाशी संबंधित अधिक माहिती क्यूआर कोडच्या माध्यमातून उपलब्ध करून देण्यात आली आहे. क्यूआर कोड स्कॅन केल्यानंतर संबंधित प्रतीकाची सविस्तर माहिती डिजिटल स्वरूपात पाहता येते. तसेच संपूर्ण देखाव्याला ऑडिओ निवेदनाची जोड देण्यात आली आहे. त्यामुळे भेट देणाऱ्यांना राज्य प्रतीकांची माहिती पाहण्यासोबतच ऐकूनही घेता येते.