एक्स्प्रेस वेवर बसला अपघात
पाच प्रवासी जखमी; दोन गंभीर

खोपोली, ता. ७ (बातमीदार) ः पुणे येथून ठाण्याला एक्स्प्रेस वेमार्गे निघालेल्या एसटी महामंडळाच्या प्रवासी बसला खोपोली हद्दीत अपघात झाला. गुरुवारी रात्री साधारण दहा वाजण्याच्या सुमारास हा अपघात घडला असून बसमध्ये एकूण ३० प्रवासी होते. अपघातात पाच प्रवासी जखमी झाले असून यातील दोघे गंभीर जखमी असल्याचे सांगितले जात आहे. पाचही जखमींना तातडीने एमजीएम रुग्णालयात उपचारासाठी दाखल करण्यात आले.
ही बस रात्री दहा वाजण्याच्या सुमारास खोपोली हद्दीतून एक्स्प्रेस वेने जात असताना आडोशी उतारावर बस अनियंत्रित होऊन बसने पुढील कंटेनरला जोरदार धडक दिली. यात बसमधील ३० पैकी पाच प्रवासी जखमी झाले आहेत. जखमींमध्ये तीन पुरुष, एक महिला व एका लहान मुलाचा समावेश आहे. यातील दोघे पनवेल व तीन जण ठाणे परिसरातील रहिवासी आहेत. अपघाताची माहिती होताच सर्व आपत्कालीन यंत्रणा, वाहतूक पोलिस, खोपोलीतील सामाजिक कार्यकर्त्यांनी तातडीने मदतकार्य करून प्रथम जखमी प्रवाशांना पुढील उपचारासाठी दाखल करण्याची कामगिरी बजावली. त्यानंतर अपघातग्रस्त बस एका बाजूला आणून वाहतूक सुरळीत केली. या अपघाताची खोपोली पोलिसात नोंद झाली असून पुढील तपास सुरू आहे.
...
जखमींची नावे
विनिद गोरे (वय ५६), रामचंद्र बाबर (वय ५४), सुजाता खडतरे (वय ५८), प्रीतम पाटील (वय २८) व एक मुलगा (नाव समजले नाही)