महाड, ता. ३ (बातमीदार) ः महाड अतिरिक्त औद्योगिक क्षेत्रात असलेल्या ब्लू जेट हेल्थकेअर या कंपनीत आज सकाळी दहा वाजण्याच्या सुमारास भीषण स्फोट झाला. यामध्ये कंपनीमध्ये काम करीत असलेल्या कर्मचाऱ्यांपैकी सात जण गंभीर जखमी झाले, तर ११ जण दगावल्याची भीती व्यक्त केली जात आहे. महाड एमआयडीसीमधील अग्निशामक यंत्रणेच्या आवाक्याबाहेरील प्रकरण असल्यामुळे राज्य शासनाने या ११ जणांना बाहेर काढण्यासाठी एनडीआरएफला पाचारण केले.
महाड औद्योगिक वसाहतीमधील खासगी लिमिटेड या कंपनीमध्ये आज सकाळी दहा वाजण्याच्या भीषण स्फोट झाला. या स्फोटानंतर कंपनीच्या प्लांटमध्ये असलेल्या एका रिएक्टर्सचा स्फोट झाला. यामुळे आग पसरत गेली आणि रिएक्टर्सचे एका मागून एक असे स्फोट होत राहिले. कामगार जिकडे वाट मिळेल तिकडे पळू लागले. शेजारी असलेल्या कंपन्यांतील कामगारांनीदेखील सुरक्षेच्या कारणामुळे कंपनी बाहेर पडून सुरक्षित ठिकाणी आश्रय घेतला.
ब्ल्यू जेट कंपनी स्फोटात जमीन दोस्त झाली. लोखंडाचे खांब वितळून गेले. ढिगाऱ्‍याखाली ११ कामगार अडकले. ते दगावले असल्याची शक्यता वर्तवण्यात येत आहे. यातील चार कामगार स्थानिक असून इतर कामगार परराज्यातील आहेत. अग्निशामक दलाने आग आटोक्यात आणण्याचा प्रयत्न केला; ढिगाऱ्याखाली अडकलेल्या ११ कामगारांना काढणे शक्य होत नसल्याने मदत कार्यासाठी पुणे येथून एनडीआरएफला बोलावण्यात आले.
...
जखमी कामगार
स्वप्नील भामरे, विक्रम ढेरे, निमाची मुरमू, मयूर निंबाळकर, राहुल गिरमे, उत्तम विश्वास, ज्योतू पुरब
...
हे कामगार दगावल्याची भीती
जीवन कुमार चोबे, अभिमन्यू उंराव, विकास महातो, अक्षय सुतार, सोमीनाथ विधाते, विशाल कोळी, संजय पवार, असलम शेख, सतीश साळुंखे, आदित्य मोरे, शेषराव भुसारे हे कामगार दगावल्याची भीती व्यक्त होत आहे.
...
ब्ल्यू जेट कंपनीमधील ११ कामगारांचा शोध घेण्यात येत आहे. प्रशासनाकडून या ठिकाणी आवश्यक ती खबरदारी घेतली जात आहे.
- डॉ. ज्ञानोबा बानापुरे, प्रांताधिकारी, महाड