महाड, ता. ३ (बातमीदार) : तीन वर्षांपासून महाडकरांना भेडसावणारी पाणीटंचाईची समस्या नगरपालिकेने केलेल्या पूर्व नियोजनामुळे यंदा दूर झाल्याने नागरिकांमध्ये समाधान व्यक्त होत आहे. महाड शहरातील बहुतांशी भागांत कोतुर्डे धरणातून पाणीपुरवठा होतो. याशिवाय नगरपालिकेच्या कुर्ले धरणातून एमआयडीसी मधूनही काही भागांना पाणीपुरवठा केला जातो.
शहरातील लोकसंख्या दिवसेंदिवस वाढत असून पाण्याची गरज वाढली आहे. त्यामुळे धरणातून पाणीपुरवठा एप्रिलपासून कमी पडू लागतो. यानंतर धरणातील मृत साठ्यावर पाण्याची गरज भागवावी लागते. त्यामुळे अनेक ठिकाणी टँकरने पाणीपुरवठा करावा लागतो. तर काही गृहनिर्माण सोसायटी स्वखर्चाने पाण्याचा टँकर मागवतात. विंधन विहिरी व विहिरीतील पाणीही कमी होत जातो व नागरिकांना मोठ्या पाणीटंचाईला तोंड द्यावे लागते.
काही वर्षांचा अनुभव लक्षात घेता नगरपालिकेने यंदा पाण्याबाबत योग्य नियोजन केले. प्रथम एक दिवसाआड पाणीपुरवठा सुरू करण्यात आला. कोथुर्डे धरणातील पाणी बंद झाल्याने एमआयडीसीतील पाणी घेऊन हे पाणी शाळा क्रमांक पाच येथील टाकीत साठवले गेले. साठवण टाकीपासून छत्रपती शिवाजी महाराज चौकातील टाकीला जोडणारी जुनी मात्र वापरात नसलेली जलवाहिनी व विंधन विहिरी दुरुस्त व स्वच्छ करून एमआयडीसीकडून येणारे पाणी टाकीतून छत्रपती शिवाजी महाराज चौकातील कोथुर्डे धरणातून पाणीपुरवठा केला जाणाऱ्या जलवाहिनीला जोडण्यात आले व हे पाणी टंचाईग्रस्त भागाला देण्याचा यशस्वी प्रयत्न करण्यात आला. त्यामुळे शहरातील बहुसंख्या भागात एमआयडीसीचे पाणी पोहोचू शकले.

शहरात दरवर्षी भेडसावणारी पाणीटंचाईची झळ नागरिकांना फारशी जाणवली नाही. पाणी सोडण्याच्या वेळा प्रत्येक प्रभागानुसार निश्चित करण्यात आल्याने सर्व प्रभागांमध्ये योग्य रीतीने पाणी पोहोचू शकले. यामुळे टँकरद्वारे होणारा अतिरिक्त खर्च वाचण्यात पालिकेचा पाणीपुरवठा विभागाला यश आले.
- रोहित भोईर, अभियंता, पाणीपुरवठा विभाग, नगरपालिका