महाड, ता.२ (बातमीदार): मद्य वाटपावरून दोन मित्रांमध्ये झालेल्या वादाचे पर्यवसान हाणामारीत झाल्याचा प्रकार सोमवारी रात्री महाडमध्ये घडला. या घटनेत एक जण गंभीर जखमी असून, महाड एमआयडीसी पोलिस ठाण्यात गुन्हा दाखल करण्यात आला आहे.
महाड औद्योगिक क्षेत्रातील आसनपोई गावातील एका कारखान्यात काम करणारे बिरबल यादव, मिथिलेश सिंग (दोघेही राहणारे बिहार) आणि प्रसनजीत शांतिदास (रा. पश्चिम बंगाल) मद्य पिण्यासाठी एकत्र जमले होते. या वेळी प्रसनजीत आणि मिथिलेश यांच्यामध्ये मद्य वाटपावरून वादावादी झाली. काही वेळेतच दोघांमध्ये हाणामारी सुरू झाली. मिथिलेशने लोखंडी पाइपने प्रसनजीतला बेदम मारहाण केली. त्यात डोके आणि चेहऱ्याला गंभीर दुखापत झाल्याने त्याची प्रकृती गंभीर आहे. महाड येथील ग्रामीण रुग्णालयात प्राथमिक उपचारांनंतर पुढील उपचारासाठी त्याला मुंबई येथे पाठवण्यात आले आहे.